भांगरभूंय | प्रतिनिधी
वाळपय, प्रतिनिधी: फाटल्या बारा वर्सां सावन राज्यांतल्या खण कंपनींचें काम पुरायेन बंद आसा. हाचो गैरफायदो घेवन कंपनींनी आशिल्ल्या सामानाची चोरी जावपाचे प्रकार वाडल्यात. ह्या वाठारांत उजो लागपाच्यो घडणुकोय वाडल्यात. हाचे कडेन सरकारी यंत्रणानी लक्ष दिवचें, अशी मागणी जाता.
मेळिल्ले म्हायती प्रमाण, बारा वर्सां सावन खणींचें काम बंद आसा. ह्यो खणी सद्या तरी सरकाराच्या ताब्यांत आसात. खण कंपनींची मशिनरी हालयल्या. मात जीं यंत्रणां हालोवप शक्य ना तीं सध्या खालण वाठारांत दिसतात. हातूंत खासा उदका खातीर वापरिल्लीं पायपां, मीन शुद्ध करपाक आशिल्ले प्रकल्प, लोखणाच्यो वस्तू अजूनय खण वाठारांत दिसतात.
पायपांची व्हड प्रमाणांत चोरी
खण कंपनीच्या वाठारांत आशिल्ल्या उदकाच्या पायपांची चोरी करपाच्यो गजाली फाटल्या कांय दिसां सावन वाडपाक लागल्यात. हीं पायपां लोखणाचीं आसात. ताका लागून तीं कापपा खातीर कटर वा वेल्डिंगचो वापर करतात. सध्या कांय चोर वेल्डींग आनी कटराचो वापर करून हीं पायपां चोरतात. ह्या गजालींच आतांच आळो घालपाची गरज आसा.
हीं पायपां कापपा खातीर वेल्डींग आनी कटर वापरिल्ल्यान भोंवतणी आशिल्ल्या तणाक उजो लागपाच्यो घडणुको वाडल्यात. फाटल्या पंदरा दिसांनी दोन फावटीं हांगा सुक्या तणाक उजो लागला. ताका लागून सैमाक मार बसला. हे चोरयेचे प्रकार आतांच आडावंक ना जाल्यार फुडें कंपनी वाठारांत लोखणाची व्हडा प्रमाणांत चोरी जावपाची शक्यता आसा. हांगा पुलिसांची गस्त वाडोवन ह्या चोरयांक आळो हाडपाची मागणी नागरिकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
