भांगरभूंय | प्रतिनिधी
मडगांव, प्रतिनिधी : भाजपाक सगळ्या जाग्यांचेर लढो दिवपाचें आसता. जंय संद नासता थंय संद निर्माण करपाचें काम भाजप करता. गोंयांत धेंपे हें व्हडलें नांव जावन आसा. ह्या धेंपे ब्रँडाचो वापर करून भाजप दक्षीण गोंयांत वेंचणूक जिखपाक सोदता. कॉंग्रेसीन उमेदवार आजूनय जाहीर करूंक ना. भाजप कार्यकर्ते कितलो प्रचार करता, हाचेर सगळें निंबून आसा. मात आपूण भाजपा वांगडा आसचो ना, अशें गोवा फॉरवर्ड अध्यक्ष विजय सरदेसाय हांणी सांगलें.
दक्षीण गोंय लोकसभा वेंचणुके खातीर भाजपान पल्लवी धेंपे हांच्या नांवाचेर शिक्को मारला. हाचेर प्रतिक्रिया दितना आमदार सरदेसाय हांणी, भाजपान आमदारांक पक्षांत प्रवेश दिला तरीय तांकां दक्षीण गोंयांत लोकसभा वेंचणूक जिखपाची आस्त ना. जांणी लोकांचो विस्वासघात केला तांकां लोकांच्या दारार व्हेल्यार लोक मतां दिवचे नात. हे परिस्थितीचो अभ्यास केल्या उपरांत भाजप पक्षश्रेष्ठींनी धेेंपे ह्या ब्रँडाचो वापर करुन वेंचणूक जिखपाचो यत्न सुरू केला.
भाजपच्या पक्षश्रेष्ठींनी गोंयचे परिस्थितीचो बरो अभ्यास केला. पक्षांतर केल्ल्या आमदारांच्या नांवान मतां मेळचीं नात आनी जीं नांवां पक्षा कडल्यान दक्षीण गोंयच्या उमेदवारी खातीर दिल्लीक धाडिल्लीं, तांतलें एकूय नांव जिखपाक शकना हें दिसून आयल्या उपरांत भाजपान बायलांक फुडें काडपाचो निर्णय घेतलो. मात, भाजप बायलां मोर्चा कडेनूय एकूय अशें नांव नाशिल्लें जें वेंचणूक जिखपाक शकतालें. ताका लागून धेंपे हें नांव मुखार हाडलां. धेपें हें राज्यांतलें व्हडलें नांव. बाबा (श्रीनिवास) धेंपे हांचें काम सर्वश्रुत आसा. भाजपच्या ब्रँडाचेर वेंचणूक जिखपाक शकना हें कळटांत धेंपे ह्या ब्रँडाचेर वेंचणूक जिखपाचो भाजपाचो यत्न आसा, अशें सरदेसाय हांणी म्हणलें.
बाबा धेंपे हे म्हजे बरे इश्ट. तांचे इश्ट सगळ्या पक्षांनी आसात. मात सध्या राजकारण बदल्लां, मतदान प्रक्रियेंतल्यान जिखप हें वेगळेंच जावन आसा. भाजपाचे कार्यकर्ते कितले यत्न करतले, हें सगळें पळोवचें पडटलें. कॉंग्रेसीनूय आजूनय उमेदवार जाहीर करूंक ना. मात आपूण भाजपा वांगडा आसचो ना.
भाजपच्या पक्षचिन्हाचो इतलो प्रभाव जर आसलो जाल्यार आपूण आमदार म्हणून वेंचून येवपाचों. आपूण एकदां अपक्ष आनी दोन फावटीं नाल्ल ह्या चिन्नाचेर वेंचणूक लढोवन जिखलों. गोंयचे सुशिक्षीत जनतेक सगळें खबर आसा. मतदार विचार करून मतदान करतात, अशेंय सरदेसाय हांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
