भांगरभूंय | प्रतिनिधी
अंदूं जे इकरावेक प्रवेश घेतले तांकां नवे शिक्षणीक येवजणेक तोंड दिवचें पडटलें. म्हाका तें खबर नासलें, अशें विद्यार्थी म्हणपाक शकना. आवय भाशेक चड म्हत्व दिवप हें ह्या धोरणाचें खाशेलपण. मुखेल विशय सोडले जाल्यार हेर विशय घेवपाची मेकळीक विद्यार्थ्यांक आसतली. ह्या सर्तीच्या युगांत एकतरी कुशळटाय आपले कडेन आसपाक जाय. आळशीपण विसरपाक जाय. आवय- बापूय दितलो हाचेर रावंक फावना. सादें उदाहरण घेवया. दरेका घरांत माड हो आसताच. ताचेर चडपी पाडेली मेळप खूब कठीण. सरकारान पाडेल्यांक प्रशिक्षण दिल्लें, वयर चडपाचें यंत्रण लेगीत आसा, तरीय पाडेली मेळनात. तुमी हेराचें नाल्ल काडूं नाकात, पूण स्वताच्या माडाचे तरी नाल्ल काडूं शकतात. हाकाच कुशळटाय म्हणटात. हालींच मुख्यमंत्री डाॅ. प्रमोद सावंत हांणी, दक्षीण गोंयांत दुसरें वैजकी म्हाविद्यालय सुरू जातलें, अशी घोशणा केल्या. सध्या आचारसंहिता आशिल्ल्यान ताचेर फुडलो निर्णय मुखर जातलो.
जायते दोतोर जातात. पूण स्पेशालिस्ट, सर्जन जालो जाल्यार तुमच्या आंगांतली कुशळटाय मजतीक येता, हें आमी विसरूंक जायना. दोतोर जावपाक नीट परिक्षा पास जावपाक जाय. विज्ञान फाटो, संबंदीत विशय घेवपाक जाय. तुमकां जर वेवसाय करपाक जाय जाल्यार ताचो अणभव जाय. तो शिकतना घेवं येता. एक वेवसाय म्हणल्या घरच्या घरा म्होंव तयार करून तें विकप. म्होंवाचे मूस म्हणटकच ते चाबतले काय, अशें प्रत्येकाच्या मनांत येता. ह्या वेवसायाचें प्रशिक्षण घेतलें जाल्यार तुमकां तो सोंपेपणी करपाक मेळटा. बाणावलेचो सुप्रजित रायकार हाणें संगणक पदव्युत्तर पदवी घेतली.मागीर तो म्होंवा मुसाचें मजतनी म्होंव एकठांय करपाचें शिक्षण पुण्यां वचून शिकलो. आयज तो तें कार्यशाळां वरवीं हेरांक शिकयता. खादी आनी ग्रामोद्देग विकास, शेतकी खातें ताका
मजत करतात. हाचो सगल्यांनी लाव घेवपाक जाय, अशें रायकार हाचें मत.
शास्त्रज्ञांच्या मतान, म्होंवा मूस जर संवसारांतल्यान ना जाले जाल्यार मनीस जात जिवी उरपाची ना. अन्न सांखळेंत हे मूस म्हत्वाचें योगदान दितात. पर्यावरण शिकपी मनशाक हें खबर आसतलेंच. रायकार हांणी नोकरे फाटल्यान लागनासतना स्वताचो वेवसाय सुरू केलो. गोंयभर ते कार्यशाळा घेतात. म्होंवा मुसा विशीं तांकां आशिल्लें गिन्यान ते सामान्यां मेरेन व्हरपाचो यत्न करतात. ताच्या वेवसायाची म्हायती दिवपी लेख साबार कडेन छापून आयल्यात. शाळांतल्या विद्यार्थ्यांक ते मुफत म्हायती दितात. आतां मेरेन पांचशें परस चड विद्यार्थ्यांनी तांचे कार्यशाळेचो लाव घेतला.
तांणी देडश्यां वयर म्होंव एकठांय करपाचीं केंद्रां गोंयभर सुरु केल्यांत. रायका हनी हाचीं उत्पादनां तुमकां बाणावले माझीलवाड्यार मेळटात. अॅमेझोनाचेरुय मेळटात. प्रशिक्षणा विशीं चवकशी करपाची आसल्यार तुमी 9689924767 ह्या क्रमांकाचेर फोन करूं शकतात वा [email protected] ह्या इमेलाचेर संपर्क करूं शकतात. हो व्यवसाय तुमी केन्नाय सुरु करूं शकतात, पूण मार्गदर्शन घेवनूच तुमी तो सुरू करचो अशें रायकार हांचें म्हण्णें. हातूंतल्यान तुमी स्वावलंबी तर जातलेच, खेरीज पर्यावरणाक लेगीत मजत करपाचें व्हड काम करूं शकतले. तेन्ना वेळ व्हगडाय नासतना रायकर हांचे कार्यशाळेंत जरूर वांटो घेयात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
