भांगरभूंय | प्रतिनिधी
दुस-याची संहिता आपुण काॅपी करप आनी लेखक म्हणून आपलें नांव घालप ही एक प्रकारची फटिंगपणाच.
ल्हानपपणान शाळेंत आसतना काॅपी करप म्हळ्यार पाप वा चुकीचें हें कळटालें. एखादो शिकपाक हुशार नाशिल्लो भुरगो पास जालो जाल्यार तो काॅपी मारुन पास जालो आसतलो अशे म्हणपाकुय लोक फाटीं फुडें पळय नाशिल्लें.
मुळात काॅपी ही खुब प्रकारची आसपाक शकता. परिक्षेक काॅपी मारता ती वेगळी. खंयच्या नामनेच्या फिल्म स्टाराक वा खेळगड्याक काॅपी करप वेगळें. जाय ते लोक आसात जे कोणाची तरी हेयर स्टायल काॅपी करतात, कपड्याची काॅपी करतात ती वेगळी. सिनेमांतल्या नटनटांची काॅपी करपाक काय हरकत ना. सुपरस्टार अमिताभ बच्चनाची काॅपी करपाचो खुप जाणांनी यत्न केलो, पुण अमिताभ बच्चन तो अमिताभ बच्चन. हो जालो वेगळो विशय. आयज बाँलिवुड लेगीत सावथाची काॅपी करपाक लागला.
आमच्या गोंयान लेगीत खास करुन वेवसायिक नाटकां खंयचे तरी मराठी नाटकाची वा फिल्माची काॅपी करपाचे प्रकार खुब वाडल्यात. एक प्रकारचे काॅपी करपाचें सत्र चालु जालां. काॅपी केली म्हणुन तशी काय हरकत ना, पुण कांय लोक काॅपी करुन मुळ लेखकाच्या नांवाचो उल्लेख पसून करीनात. ही एक प्रकारची ते संहितेची मोठी चोरीच. म्हाका तरी अशें दिसता. दुस-याची संहिता आपुण काॅपी करप आनी लेखक म्हणून आपलें नांव घालप ही एक प्रकारची फटिंगपणाच. तशे इंग्लिश वा आनीक खंयचेय भाशेंतले संहितेची काॅपी करुन ती आपले भाशेंत दर करुन लोकां रेन पावोवप तशे गैर न्हय, पूण मूळ लेखकाचें नांव दिवप गरजेचें. कारण मुळ लेखकाची ताचे फाटल्यान मेहनत आसता. ताची स्वताची संकल्पना आसता. ती चोरून आपलें नांव दिवप हें योग्य न्हय, हें आमी विसरूक फावना.
आयज काॅपी करप ही पसून एक कला, अशें म्हणपी लोक आसात…. आनी आसतले हातुंत मात्तुय दुबाव ना. जाय ते नाट्य सर्तींनी लेगीत, खंयचे तरी दुसरे भाशेची नाट्य संहीता अनुवादीत करुन ती सादर करतात. तसो उल्लेखुय केल्लो आसता. पुण खास करुन नाट्य सर्तींनी जे लेखक आपली स्वताची, स्वतंत्र अशी नाट्य संहीता बरोवन सादर करतात तांकां चड प्राधान्य दिल्यार फुडाराक नवीन आनी स्वतंत्रपणान बरोवपी लेखक घडटले. फुडें येतले. रसिक प्रेक्षकांकुय कितेंतरी नवें पळोवपाक मेळटलें. अशे म्हण्टात, आमी जेन्ना कसलीय संकल्पना काॅपी करतात तेन्ना आमी स्वताची विचार करपाची तांक कमी करुन घेतात. मुळात काॅपी मारप हाचेर प्रत्येकाचो वेगळो विचार आसपाक शकता. पुण काॅपी मारप तिवुय बी चोरुन, लिपचोरयां हे चुकीचें हेवुय तितलेंच खरें….आनी आमी ही गजाल समजून घेवप ही काळाची गरज आसा.
सुनील कांता नायक
9881907604
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
