भांगरभूंय | प्रतिनिधी
खबरां संस्था
अहमदाबादः जैताचे दालें खंयच्या पंगडा वटेन देंवतलें हे निमण्या तीन बॉलां मेरेन कळनाशिल्लें अशे उमळशीक वाडोवपी आयपीएलाच्या पांचवे मॅचींत मुंबय इंडियन्साक 6 धांवड्यांनी हारोवन शुममन गिलाच्या गुजरात टायटन्सान जैताची सलामी दिली. गुजराताची कॅप्टनशीप सोडून मुंबड इंडियन्साचो कॅप्टन जाल्ल्या हार्दिक पंड्याक आयपीएलाचे पयलेच मॅचीतं हार खावची पडली. मात ह्या लो स्कोरींग मॅचींत जिखता अशें दिसतना मुंबयक हार खावची पडली हाची चुटपूट सगल्यांक लागली.
गुजरात टायटन्सान दिल्लें 169 धांवड्याचें लक्ष्य मुंबय इंडियन्स सहज हातासतलो अशें तांच्या डावाच्या निमण्या चार ओव्हरी मेरेन दिस तालें. मात 5 आवट 142 उपरांत लक्ष्याच्या लागीं पावपाच्या चेंपणा खाला ताचें 4 बॅट्समन 20 धांवड्यांत बाद जाले आनी जैताचे सुवातेर तांका 6 धांवड्यांनी हार खावची पडली. मुंबय इंडियन्साचो एक रन जाल्लो तेन्ना ओपनर इशान किशन शून्याचेर कॅच आवट जालो. रोहीत शर्मा आनी नमन धिरान डाव साल्वार केलो. पंगडाक 3 आवट 107 अशे बरे स्थितींत हाडून रोहीत 29 बॉलांत 7 चौके आनी एक सक्यान 43 धांवड्यो करून साई किशोराच्या बॉलर एलबीडब्ल्यू जालो. नमनाक (20) अझमतुल्लान एलबीडब्ल्यू केलें. उपरांत डेव्हाल्ड ब्रेवीसान बॅटिंगेची सूत्रां आपल्या हातांत घेतलीं. 14 ओव्हरींत ताणे तिलक वर्माक वांगडा जु घेवन 121 धांवड्यो केल्यो तेन्नाच मुंबयचें जैत दिसपाक लागिल्लें. मात पंगडाच्यो 129 घांवड्यो जाल्ल्यो तेन्ना बॅवीसाची मोहीत शर्मान आपल्याच बॉलाचेर आपणेच कॅच घेतली. ताणे 38 बॉलांत 2 चौके आनी 3 सक्यांनी 46 धांवड्यो केल्यो. निमाण्या 17 बॉलांत मुंबयक जैता खातीर 35 धांवड्यो जाय आशिल्ल्यो. मात टीम डेव्हीड (11) आवट जाल्या उपरांत कॅप्टन हार्दिक पंड्या (11), जेराल्ड (1), पियुश चावला (0) अंडर प्रेशर खेळटना आवट जायत गेले. 20 ओव्हरींत 5 आवट 142 उपरांत 9 आवट 162 असो तांचो डाव सोपलो. अझमतुल्ला, उमेश यादव, स्पॅन्सर जोन्सन आनी मोहीत शर्मा हांणी देरकी दोन विकेटी घेवन गुजराताक तांच्या घरच्या मैदानार एक व्हड जैत मेळोवन दिलें.
गुजराताच्यो 168 धांवड्यो
डब्ल्यू साहा आनी कॅप्टन शुभमन गील ह्या ओपनरांनी 31 धांवड्यांची सलामी दिल्या उपरांत साई सुदर्शनान शुभमन गील आनी अझमातुल्ला हांच्या वांगडा दुसऱ्या आनी तिसरे विकेटी खातीर केल्ले म्हत्वाचे भागिदारीक लागून गुजरात टायटन्साक आयपीएलांतले पांचवे मॅचींत आपल्या डावांत 20 ओव्हरींत 6 गडी वोगडावन फकत 168 धांवड्यो करप शक्य जालें. मुंबय इंडियन्साचो कॅप्टन हार्दिक पंड्याक हे मॅचीत एकूय विकेट मेळ्ळी ना तरी ताणे गुजराताक मर्यादीत धांवड्यांत आडावपाक येस आयलें. जसप्रीत बुमराहान मात 4 ओव्हरीतं 14 धांवड्यांत गुजराताच्यो 4 विकेटी घेवन आपलें प्रभूत्व सिद्ध केलें. जेराल्ड कोटझीन 2 विकेटी घेवंन ताका बरो वांगडो दिलो.
साई सुदर्शनान 39 बॉलांत 3 चौके आनी 1 सक्याची 45 धांवड्यांची संयमी खेळी केली. शुभमन गिला वांगडा ताणे दुसरे विकेटी खातीर 33 आनी चवथे विकेटी खातीर अझमातुल्ला वांगडा 40 धांवड्यांची सामकी गरजेची अशी भागिदारी केली. पंगडाच्यो 135 धांवड्यो जाल्लो तेन्ना तो बुमराहाच्या बॉलार तिलक वर्माच्या हातांत कॅच दिवंन आवट जालो. शुभमनान 3 चौके आनी एका सक्यान 22 बॉलांत 31 धांवड्यो केल्यो. अझमातुल्लान 17 बॉलांत 17 धांवड्यो केल्या जाल्यार डब्ल्यू साहान 15 बॉलांत 4 चौक्यांनी 19 धांवड्यो केल्यो. राहुल तेवातिया 15 बॉलांत 2 चौके आनी एका सक्यान 22 धांवड्यो केल्यो जाल्यार डेव्हीड मिलरान 12 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.