भांगरभूंय | प्रतिनिधी
येरादारी आनी पार्कींग वेवस्थेचें नियोजन; पुलिसांक आदार करपाचो उलो
भांगरभूंय । प्रतिनिधी
दिवचलः साळांतलो नामनेचो गडे उत्सव सोमार 25 मार्च ते बुधवारा 27 मार्च मेरेन तीन राती मनयतले. श्री महादेव भुमिका देवस्थान समिती, गडे मंडळ आनी साळांतल्यो विवीध संस्था तशेंच क्लबांनी सगळी तयारी पुराय केल्या. देवस्थानाचे अध्यक्ष कालिदास राऊत आनी सचीव विशाल परब तशेंच हेर वांगडी आनी म्हाजनांनी स्वता लक्ष दवरून सगळीं कामां पुराय करून घेतल्यांत.
ह्या उत्सवाच्या आयोजना खातीर घेतिल्ले बसकाक श्री महादेव भुमिका देवस्थान समितीचे अध्यक्ष कालिदास राऊत, सचीव विशाल परब आनी हेर वांगडी हाजीर आशिल्ले.
सोमारा ह्या उत्सवाक सुरवात जातली. दर राती शेंकड्यांनी भाविकांच्यो गाडयो साळांत येतात. भविकांक तशेंच गडे हाडपा खातीर गड्यांक कसलीच आडखळ येवची न्हय हे खातीर येवपी भाविकांनी गाडयो खंय खंय पार्क करचीं ताचेर बसकेंत चर्चा जाली.
धुमाशे मार्गान येवपी गाडयां खातीर दुर्गांत ह्या जमीन वाठारांत तशेंच भुमिका देवळा फाटल्या राखण्याचे होळये लागसार तशेंच भुमिका देवळाचे उजवे वटेन सोबितीकरणा खातीर बसयिल्ल्या टायल्सांचेर दुचाकी, तीनचाकी आनी चारचाकी गाडयां खातीर पार्कींग वेवस्था आसतली. कासारपाल मार्गान येवपी गाडयांक नंदीश नायक साळगांवकार हांच्या घरा कुशीक आनी जोसी (मदलोवाडो) हांच्या घरा मुखा वयले मेकळे सुवातेंत तशेंच पांडुरंग गवस आनी रावजी राऊत हांच्या घरा कुशीक गाडयो दवरच्यो. दोडामार्गा वयल्यान येवपी सगळ्यो गाडयो यशवंत राऊत आनी शैलेश राऊत हांच्या घरा कुशीचे मेकळे सुवातेंत दवरच्यो. तशेंच सगळे तरेच्यो गाडयो सरकारी हायस्कुलाच्या मैदानार दवरच्यो, अशें कालिदास राऊत हांणी सांगलें.
चड करून घुमाशें मार्गान येवपी भाविकांनी रातच्या 10 उपरांत साळांत प्रवेश करचो न्हय. रातच्या 10 वरां उपरांत धुमाशेच्या श्री सांतेरी पुरुमार देवळा लागसारचो रस्तो येरादारी खातीर बंद करतले. तशेंच कासारपाल मार्गान येवपी वाहनचालकां खातीर रातच्या 11 वरां उपरांत प्रवेश बंद आसतलो. फक्त दोडामार्ग खोलपे मार्गान येवपाक मेळटलें. हो रस्तो उक्तो आसतलो, पूण तिनूय मार्ग फांतोडेर 5 वरां उपरांतूच उक्ते करतले. ही सुचोवणी भाविकांनी लक्षांत दवरची. कसलीच वायट घडणूक घडची न्हय आनी उत्सवाचो आनंद, अणभव घेवन उत्सवा खातीर योग्य तो आदार करचो. आपलो प्रवास सुखाचो जावचो हे खातीर यत्न करचो. हो उत्सव सदांकाळ उगडासांत उरचो हे खातीर गाडयो घेवन येवप्यांनी दर राती कार्यावळ सोंपले उपरांत फांतोडेर 5 वरांचेर घरा वचपाक भायर सरचे, अशें कालिदास राऊत आनी विशाल परब हांणी उलो मारला. विशेश पुलीस आवटपोस्ट उबारतले, तशेंच गस्तीचेर पुलीस आसतले. सद्दां सांजेच्या 4 वरांचेर पुलीस गांवांत येतले. वीज खंडीत जावची न्हय हे खातीर वीज खात्याचे कर्मचारी रातची सेवा दितले. तशेंच तिरसोळी वाठारांतलो व्हाळ हुपचे खातीर माती आनी पायपांचो वापर करून तात्पुरतो सांकव बांदपाचें काम पुराय जालां. बाबरेश्वर वाठारांत चूड पळोवपा खातीर धांवपाक सोंपें जावचे हे खातीर विठ्ठल नायक हांच्या घरा मुखा वयल्या वाठाराची नितळसाण केल्या. तशेंच गड्यांक करयेश्वर वाठारांत करये हाडपाक वतना जी आडखळीची वाट आसा ती लेगीत दुरुस्त केल्या. राखण्याचे होळये लागसार आनी भाटले जमीन वाठारांत नितळसाण केल्या, अशें देवस्थान समितीन सांगलां. म्हत्वाचें म्हणल्यार येवपी भाविकांनी थंयच्या पुलिसांक तशेंच येरादारी पुलिसांक योग्य आदार करचो, अशें गडे मंडळ आनी देवस्थान समितीन मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
