भांगरभूंय | प्रतिनिधी
वास्कोः मुरगांव बंदरा कडेन वचपी बिचोली नांवाचे बार्जीचें नियंत्रण सुटिल्ल्यान खारीवाडो नुस्तेमार जेटीचेर उब्यो केल्ल्या नुस्तेमार बोटींक आपटली. ताका लागून स- सात नुस्तेमार बोटींचें लुकसाण जालें. जे कंपनीची बार्ज आसा ते कंपनीन लुकसाण भरपाय दिवची वा त्यो बोटी दुरुस्त करून दिवच्यो, अशी मागणी एक बोट धनी सायमन परेरा हांणी केल्या.
आयतारा 24 मार्चाक ती बार्ज मुरगांव बंदरा वटेन वताली, तेन्ना तिचे वयलें नियंत्रण सुटिल्ल्यान बार्ज मातशी भरकटली. भरकटिल्ली बार्ज खारीवाडो नुस्तेमार जेटी लागसार आयले उपरांत थंय उब्यो करून दवरिल्ल्या नुस्तेमार बोटींक आपटली. ताका लागून हे बोटी लागसार बांदिल्ल्यो हेर बोटी एकामेकांक आपटिल्ल्यान स- सात बोटींची मोडतोड जाली. ह्या बोटींचेर कोणूच नाशिल्लो. ह्या प्रकरणाचेर सायमन परेरा हांणी सांगलें, संबंदीत कंपनीन पळोवणी करून आमकां लुकसाण भरपाय दिवची वा त्यो बोटी दुरुस्त करून दिवच्यो. सध्या आमची परिस्थिती वायट आसा. आमकां डिझॅला वयल्या अनुदानाची रकम अजून दिल्ली ना. तशेंच आमच्यो बोटी लांकडाच्यो आशिल्ल्यान तशे तरेचें लांकूड मेळप लेगीत कुस्तार जाता. बोटी दुरुस्त करपा खातीर मेस्तकाम करप्यांक लेगीत व्हड रक्म दिवची पडटली. सध्या नुस्तें मेळनाशिल्ल्यान त्यो बोटी धक्यार बांदून दवरिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
