भांगरभूंय | प्रतिनिधी
पोरण्यो वीज सरयो, वीज साहित्य बदलपाची गरज
भांगरभूंय । प्रतिनिधी
मडगांवः नावेली वाठारांत परतून एकदां परतून परतून वीज येवपा- वचपाच्या प्रकारांत वाड जाल्या. लायटीच्या आपालिपाक लागून लोकांक त्रास जावपाक लागला.
हालींच उच्च दाबाच्यो वीज सरयो भुंयगत करपाच्या कामाक सुरवात जाल्ली, पूण काम सुरू जावपाक कळाव जातलो. कर्मचारी लायट गेली जाल्यार तत्काळ दुरुस्तीचें काम हातांत घेतात, पूण अजून लेगीत पोरण्यो वीज सरयो तशेंच पोरणें जाल्लें वीज साहित्य बदलपाची गरज आसा.
नावेली मतदारसंघांतले वीज समस्येचेर थळावे लोक साबार खेपे प्रस्न उपस्थीत करतात. मार्चांत उबाळ वाडला आनी तेच वांगडा वीज पुरवण खंडीत जावपाचे प्रकार वाडल्यात. ह्या वाठारांतली वीज समस्या सोडोवचे खातीर कांय दिसां आदींच बंद पडिल्ले कंडक्टर आनी कांय ट्रान्सफोर्मर बदल्ल्यात. तशेंच कांय पोरणें आनी मोडपाक पाविल्ले लायटीचे खांबेय बदल्ल्यांत. तरी लेगीत वीज येवपा- वचपाचे प्रकार उणे जावंक नात. ताका लागून खूब वर्सां सावन बदलूंक नाशिल्ल्यो वीज सरयो बदलपाची गरज, ह्या मतदारसंघांतल्या लोकांनी उक्तायल्या.
वीज पुरवण खंडीत जाली जाल्यार वीज कर्मचारी रातीर- मध्यानरातीर घडणुकेचे सुवातेर येतात आनी वीज पुरवण जाग्यार घालपा खातीर धडपडटात. गरजेचें साहित्य उपलब्ध नासल्यार आशिल्ल्या साहित्यांतल्यान सरयांक जोड दितात. कंडक्टर बदलून वीज पुरवण सुरळीत करपाचें काम करतात. ताका लागून लोक तांकां दोश दिनात. पूण वीज खात्यान गरजेच्यो उपाय येवजण वेळार करच्यो, अशें लोकांचें म्हणणें आसा. नावेली मतदारसंघांतल्या वीज सरयांचे केल्ले पळोवणेंत खूब कडेन वीज सरयो ह्यो कितल्याश्याच वर्सां आदीं घातिल्ल्यो आनी आतां त्यो पोरण्यो जाल्ल्याचें दिसून आयलें. पांचूय पंचायत वाठारांतल्यो उच्च दाबाच्यो वीज सरयो भुंयगत करपाचो प्रस्ताव मंजूर जावन भुंयगत केबल घालपाचे खातीर 89 कोटींचो खर्च येतलो. ताकाय मंजुरी मेळ्ळ्या. आतां उच्च दाबाच्यो सरयो भुंयगत जाल्यो तरीय हेर वीज सरयो पोरण्योच आशिल्ल्यान वीज गळटी आनी वीज सरयो तुटपाची शक्यताय तशीच उरता. तुटिल्ल्यो वीज सरयो बदलिनात जाल्यार त्यो त्याच सरयांक सरयेचो कुडको लावन जोडटात. ताका लागून वीज गळटीचें प्रमाण लेगीत वाडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
