भांगरभूंय | प्रतिनिधी
नवी दिल्ली, खबरां संस्था ः ऑनलायन मळार सोशल मिडियावर ट्रोलिंग करप हें नवें न्हय. राजकारणी, खेळगडे, सेलेब्रिटी वा खंयचोय व्हडलो मनीस ट्रोलिंगाच्या जाळ्यांत घुस्पता. हें ट्रोलींग खंयच्याय कारणा वयल्यान जावं येता. कांय राजकी पक्ष, संघटनांनी तें खातीर खाशेले लोक पसून दवरल्यात. सर्वोच्च न्यायालयाचे सरन्यायाधीश डी वाय चंद्रचूड हेय ट्रोलिंगाच्या जाळ्यांत घुस्पले. बंगळुरू न्यायीक अधिकार्यांच्या २१ व्या दोन वर्सुकी राज्य पांवड्या वयले परिशदेंत उलयतना चंद्रचूड हांणी ह्या प्रसंगा वरवीं आपलें दुख्ख मांडलें. हेच परिशदेंत तांणी काम आनी वैयक्तीक जीण सारतना ताणाचें वेवस्थापन कशें करचें? हे विशींय मत उक्तायलें.
फकत कदेलाचेर बशिल्लों…
न्यायाधीश आनी खास करून जिल्हो न्यायाधीशांच्या वावरांत ताण वेवस्थापन हें म्हत्वाचें आंग अशें चंद्रचूड हांणी सांगलें. अशें सांगतना तांणी स्वता वांगडा घडिल्ली एक घडणूक सांगली, एक म्हत्वाची सुनावणी लायव्ह स्ट्रीम जावपाक लागली आनी म्हाका ट्रोल केलो. ‘चार पांच दिसां आदली ही गजाल. सुनावणे खातीर खंडपिठांत बशिल्लों. भेंड मात्शें दुखपाक लागिल्ल्यान हांव मात्सो सांबाळून बसलों. म्हजी कदेलाचेर बसपाची स्थिती बदल्ली. ह्याच कारणाक लागून म्हाका ट्रोल केल्लो’ अशी चंद्रचूड हांणी म्हायती दिली.
हे घडणुके उपरांत सोशल मिडियाचेर जायत्या जाणांनी प्रतिक्रिया दिली. कांय जाणांनी मुखेल न्यायाधीशाची वागणूक अभिमानाची अशें म्हणलें. सुनावणे वेळार हांव कसो उठूंक शकता आनी म्हजी बसपाची स्थिती कशी बदलूं येता? ट्रोलरांनी हाचेर आक्षेप घेतलो.
हांवें फकत बशिल्ले कडेन म्हजी कूस बदल्ली अशें ट्रॉलर केन्नाच म्हणचे नात. एक चित्र तयार जालें की सुनावणी चालू आसतना हांव उठून गेलों. २४ वर्सां जालीं हांव जजींग करतां. आतां मेरेन हांवें केन्नाच न्यायालयीन कार्यवाही सोडूंक ना. फकत बशिल्ले कडेन कूस बदलिल्ल्यान म्हाका ट्रोल करतात, वायट उतरांय दितात. मात आमी (न्यायाधीश) जें करतात, ताचेर सामान्य लोकांचो विस्वास आसा अशें म्हाका दिसता. ह्याच विस्वासाक न्याय दिवपा खातीर आमी वावर चालूच दवरचो पडटलो, अशेंय तांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
