भांगरभूंय | प्रतिनिधी
मुख्यमंत्री डॉ. प्रमोद सावंत हांणी दिल्लींतले एके कार्यावळींत उक्तायलो विस्वास
पणजी, प्रतिनिधी: ‘अब की बार चारसो पार’ ही घोशणा खरी थारतनाच हे खेपो दक्षीण भारतांतूय भाजपा सयत एनडीएक दोळे दीपकावपी येस मेळटलें, असो विस्वास मुख्यमंत्री डॉ. प्रमोद सावंत हांणी उक्तायलो.
शेनवारा एनडीटीवीचें सर्वोत्कृश्ठ कामगिरी करपी राज्या खातीरचें (ल्हान राज्य गटांत) इनाम घेतले उपरांत संवादाचे कार्यावळींत ते उलयताले.
प्रचारा निमतान कर्नाटक, केरळ, तमिलनाडू, तेलंगण ह्या राज्यांची भोंवडी हांवें केल्या. दक्षीण भारतांतूय आतां भाजपाचो प्रभाव नेटान वाडपाक लागला. प्रचार करतना म्हाका ही गजाल जाणवली. हाका लागून अंदूं एकल्या भाजपाक ३७० परस चड आनी एनडीएक ४०० परस चड जागे मेळटले. ‘अब की पार ४०० पार’ हे घोशणेंत गोंयचें १०० टक्के योगदान आसतलें. गोंयचे दोनूय जागे भाजपूच जिखतलें, असो विस्वास मुख्यमंत्र्यांनी उक्तायलो.
खण उद्देग बंद जाल्ल्यान सरकाराची येणावळ उणी जाली. बेकारी वाडली. हांवें मुख्यमंत्रीपद सांबाळ्ळें तेन्ना खण उद्देग बंद आशिल्लो. २०२० वर्सा कोवीड म्हामारीक लागून लॉकडावन सुरू जालें. लॉकडावनाक लागून पर्यटन बंद जालें. ह्या वेळार सरकारान अनावश्यक खर्च उणो केलो. केंद्रीय निधीचो चडांतचड वापर केलो. केंद्रीय येवजणेचो लाव चडांतचड लोकां मेरेन पावयलो. हाका लागून अर्थवेवस्था जाग्यार आयली. लॉकडावना उपरांत स्वयंपुर्ण गोंय मोहीम सूरू केली. कोवीड वासीन दिवप १०० टक्के पुराय जाल्या उपरांत पर्यटन सुरू केलें. कोविडा उपरांत पर्यटन सुरू करपी गोंय हें पयलें राज्य आसा. स्वयंपूर्ण मोहिमेचे परिणाम आतां दिसपाक लागल्यात. म्हज्या मुख्यमंत्रीपदाच्या कार्यकाळांत उदरगत आनी मुळाव्या सुविधांचेर ३५ हजार कोटी रुपया खर्च जाल्या, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
