वारखंड्यां- फोंड्यां बस तळ्यांत वचपाची!
भांगरभूंय | प्रतिनिधी
फोंडें, प्रतिनिधी: वारखंड्यां- फोंड्यां पिकनिकेक वचपी प्रवासी बसीच्या टायरा पोंदाक फातर आयिल्ल्यान बस तळ्यांत पडपा पसून वाटावली. ही घडणूक आयतारा सकाळीं घडलीं. चालकान हॅन्ड ब्रेक ओडूंक नाशिल्ल्यान बस सुमार ५०-६० मिटराच्या अंतराचेर वचून शिरकली. चालकान बसींत चडपाचो यत्न केलो, मात बस देंवतेर आशिल्ल्यान ताका अपेस आयलें.
मेळिल्ले म्हायती प्रमाण जीए- ०८ – व्ही – ८७९८ क्रमांकाची बस वेर्णा कंपनीच्या कामगारांक घेवन उसगांव वाठारांत पिकनिकेक वताली. वारखंड्यां कांय कामगारांक घेवपा खातीर चालकान हनुमान तिर्थ तळये लागसारा बस थारायली.
कामगारांचें सामान बसींत घालपाक चालक बसींतल्यान सकयल देंवलो. मात ताणें हॅण्ड ब्रेक लावंक नाशिल्ल्यान बस देंवतेर सकयल देंवपाक लागली. बस सकयल देंवता तें पळोवन चालकान बसीन चडपाचो यत्न केलो. मात बस वेगान फुडें गेल्ल्यान चालक जमनीर कोसळ्ळो. बस हनुमान तिर्थ तळये लागसारा रस्त्या कुशीक आशिल्ल्या फातराक लागून उबी रावली, नाजाल्यार तळयेंत वचपाची. बसींत पिकनिकेक वचपी जायते प्रवासी आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
