भांगरभूंय | प्रतिनिधी
जोयडा, खबरा संस्था : अनमोड अबकारी तपासणी नाक्यार शुक्रारा रातचो गोंय सोरो तस्करीच्या दोन प्रकरणांत अधिकार्यांनी सुमार १६ लाख रुपयांचो ५५.२५० लिटर सोरो आनी दोन वाहनां जप्त केलीं. तशेंच ह्या प्रकरणांत दोगांक अटक केल्या.
पयल्या प्रकरणांत मिश्रा कोटे- कलघटगी हांगच्या शरीफ हजरेसाब (३०) ह्या वाहन चालकाक अटक करून ताचे कडल्यान के. ए. २५, एए. ३९८० ह्या क्रमांकाची गाडी अबकारी विभागान ताब्यांत घेतल्या. जाल्यार दुसर्या प्रकरणांत धारवाड हांगच्या निंगप्पा बाडद हाका अटक करून ताचे कडल्यान के.ए. २५, एए. ५७० हें वाहन जप्त केलां. ह्या दोनूय वाहनांनी ५५.२५० लिटर सोरोय अधिकार्यांनी जप्त केला.
अनमोड अबकारी विभागाचे अबकारी निरीक्षक सुनील कुमार हांच्या मार्गदर्शना खाला उपनिरीक्षक शिवशंकर यू, कर्मचारी विक्रम बिडकार, बसवराज गडन्नवर, दयानंद मिराशी, रामनगर पुलीस स्टेशनाचे राजू राठोड हांणी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
