भांगरभूंय | प्रतिनिधी
बसका अर्दवट सोडिल्ल्या प्रकरणांत तीन दिसां भितर जाप दिवपाचो निर्देश
भांगरभूंय । प्रतिनिधी
वास्कोः सांकवाळ पंचायतीची शुक्रारा 22 मार्चाक जाल्ले बसके संबंदांत तीन पंचांनी गट विकास अधिकारी कार्यालयांत लेखी कागाळ दिले उपरांत सांकवाळ पंचायतीच्या सचिवान तीन दिसां भितर ते संबंदांत जाप दिवची, असो मेमो गट विकास अधिकारी डिसोझा हांणी धाडला.
सांकवाळ पंचायतीच्या प्रभाग 2 तल्या नियोजीत मेगा हावसींग प्रकल्पाक थळाव्या लोकांचो विरोध आसा. 2009 त ह्या प्रकल्पाक विरोध जाल्ल्यान प्रकल्पाचें काम फुडें जावंक नाशिल्लें. पूण आतां ह्या प्रकल्पाक सांकवाळ पंचायतीच्या सत्ताधारी गटान 11 मार्चाक जाल्ले पंचायतीचे बसकेंत बांदकाम परवानो दिवपाचो थाराव घेतिल्लो. ते उपरांत 11 मार्चाक जाल्ले बसकेच्या इतिवृत्तांताक मंजुरी दिवचे खातीर 22 मार्चाक पंचायतीची साबार बसका जाल्ली. हे बसकेक थळावे लोक व्हड संख्येन हाजीर राविल्ले.
हे बसकेंत सत्ताधारी गटांतले पंच आनी विरोधी पंच हांचे मदीं वाद जावपाचे प्रकार घडले. ताका लागून सरपंच, उपसरपंच, सत्ताधारी गटांतले पंच, सचीव बसका अर्द्यार सोडून उठून गेले. ती बसका तहकूब करूंक ना तशेंच ते बसकेंत इतिकृत्ताक मंजुरी दिवपाचें काम पुराय करूंक ना. खंयच्याच निर्णया बगर बसका सोडून गेल्ले खातीर पंच तुळशीदास नायक, पंच निधी नायक, पंच मॉर्लियो कार्व्हालो हांणी मुरगांव गट विकास अधिकाऱ्यां कडेन लेखी कागाळ केल्ली. ते कागाळेंत बसका अपूर्ण उरिल्ल्याचें स्पश्ट केल्लें. मुव्हमेंट बुकांत कसलीच म्हायती बरय नासतना सरपंचा सयत सचीव पंचायत कार्यालया भायर गेले. तशेंच सचिवान इतिवृतांत नोंदवही आपल्या वांगडा व्हेल्ल्याचें कागाळेंत म्हणिल्लें. ह्या प्रकरणाची दखल घेवन गट विकास अधिकाऱ्यान ते कागाळीक जाब दिवपाक सचिवाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
