भांगरभूंय | प्रतिनिधी
पणजी, बातमीदार ः लोकसभा वेंचणुकेंत भाजपाच्या दक्षिण गोंयच्या उमेदवाराचें नांव आयज रातीं जाहीर जातलें. जाल्यार काँग्रेस 27 मार्चाक दोनूय मतदारसंघांचे उमेदवार जाहीर करतले. भाजपान दक्षीण गोंयां खातीर उद्देजक श्रीनिवास धेंपे हांची घरकान्न पल्लवी धेंपे हांचे नांव निश्चित केलां. आज रातीं दिल्लींतल्यान तांचें नांव जाहीर जावपाची शक्यताय आसा. हे फाटभुंयेर मुख्यमंत्री डॉ. प्रमोद सावंत आनी भाजपाचे प्रदेशाध्यक्ष सदानंद शेट तानावडे दिल्लींत गेल्यां.
सत्ताधारी भाजपान पयले वळेरेंतल्यान उत्तर गोंयां खातीर केंद्रीय मंत्री श्रीपाद नायक हांचें नांव जाहीर केलें. पूण, दक्षिण गोंयचो उमेदवार दितना भाजपांतलो हुस्को वाडलो. दक्षिण गोंयां खातीर भाजपान पयलीं आदले खासदार नरेंद्र सावयकार, आदले उपमुख्यमंत्री बाबू कवळेकार आनी आदले आमदार दामू नायक हांचीं नांवां संसदीय समिती कडेन धाडिल्लीं. ताचेर चर्चा चालू आसतना दक्षिण गोंयचो उमेदवार बायलांक दिवपाचो विचार करून भाजपाच्या केंद्रीय फुडाऱ्यांनी राज्य भाजपा कडल्यान इत्सूक बायलांचीं नांवां घेतिल्लीं. ते प्रमाण गोंयच्यान महिला मोर्चाची आदली अध्यक्ष सुलक्षणा सावंत, दक्षिण गोंय जिला पंचायत अध्यक्ष सुवर्ण तेंडुलकार, आदली बायल आयोग अध्यक्ष विद्या गावडे, लेखिका आनी भाजपा समर्थक शेफाली वैद्य आदी. हांची नांवां धाडिल्ली. ते उपरांत पल्लवी धेंपे हांचे नांवूय हे वळेरेंत जोडलें. निमाणे भाजपान पल्लवी धेंपे हांकां हे खेपे दक्षिण गोंयांतल्यान उबे करपाचे निश्चित केला. देखून आयज रातीं दिल्लींतल्यान तांचें नांव जाहीर जावपाची शक्यताय आसा. भाजपा कडल्यान आयज दक्षीण गोंयां सयत महाराष्ट्र, कर्नाटक आनी अस्तंत बंगालांतल्या उमेदवारांचीं नांवां आयज जाहीर करतली अशी म्हायती सूत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
