भांगरभूंय | प्रतिनिधी
पणजी, बातमीदार ः राजधानी पणजेंत 31 मे मेरेन गाडयांक पे-पार्किंग शुल्क भरचो पडचो ना. पणजीत स्मार्ट सिटी खाला चालू आशिल्ल्या कामांच्या फाटभुंयेर पणजी पालिका म्हामंडळान हो निर्णय घेतला. पालिका म्हामंडळाच्या ह्या निर्णयाक लागून पणजेक वचपी आनी येवपी हजारांनी लेकांक सुटका मेळ्ळ्या.
पणजेंतल्या चडशा सुवातींनी गाडयो पार्क करपाक पयशे दिवचे पडटात. फाटल्या देड वर्सां सावन पणजीत स्मार्ट सिटी खाला कामां चालू आसात. ताका लागून जायत्या वाठारांनी रस्ते खणल्यात. देखून थळाव्या लोकांक तशेंच कामा निमतान येवपी नागरिकांक गाडयो पार्क करपाक सुवात ना. जंय जंय सुवात मेळटा थंय लोक गाडयो पार्क करतात. तरी लेगीत तांकां पे-पार्किंग खातीर पालिके कडल्यान थारायिल्ली शुल्क भरचें पडटात. हाका लागून फाटल्या कांय म्हयन्यां सावन जायत्या वाहन चालकांनी तिडक उक्तायली. विरोधी नगरसेवकांनी पालिका मंडळाचे बसकेंत जायते फावट हो प्रस्न मांडिल्लो. पूण पालिकेन ताचे कडेन दुर्लक्ष केल्लें. पूण आतां नगराध्यक्ष रोहित मोन्सेरात हांणी स्मार्ट सिटीचीं कामां पुराय करपा खातीर दिल्ल्या 31 मे मेरेनच्या काळा मेरेन चालकां कडल्यान पे-पार्किंग शुल्क घेवचे नात असो निर्णय घेतला.
मजगतीं, सत्ताधारी गटाचो नगरसेवक वसंत आगशिकार हांणी डिसेंबर 2022 सावन पे पार्किंग शुल्क घेवपाक विरोध उक्तायिल्लो. स्मार्ट सिटीच्या कामांचो भार चालकांक सोंसचो पडटा. ते खातीर हीं कामां पुराय जायसर तांचे कडल्यान पे पार्किंग शुल्क घेवचें न्हय अशीय मागणी तांणी केल्ली. आतां पालिकेन फुडले दोन म्हयने रे पार्किंग शुल्क घेवचें ना अशें थारायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
