मॉस्को कॉन्सर्ट हॉलांत हल्लो, 60 जाणांक मरण, 145 परस चड जखमी
भांगरभूंय | प्रतिनिधी
मॉस्को, खबरां संस्था ः रशियेची राजधानी मॉस्कोच्या एका कॉन्सर्ट हॉलांत शुक्रारा रातीं (22 मार्च) आतंकवादी हल्लो जालो. हांतूत 60 जाणांक मरण आयलें जाल्यार 145 परस चड जखमी जाल्यात. ह्या हल्ल्याची जापसालदारकी इस्लामिक स्टेट म्हळ्यार आयसिसान (ISIS) घेतल्या.
मॉस्कोच्या संगीत कार्यावळीक हजारांनी लोक जमिल्ले. ह्या वेळार स ते सात हल्लेखोरांनी अचकीत फारपेट केलो. हे फारपेटांत 60 जाणांक मरण आयलें जाल्यार 145 परस चड जाण जखमी जाल्यात. हल्लेखोर सुमार 15 ते 20 मिनटां फारपेट करताले. हाचे उपरांत अचकीत कॉन्सर्ट हॉलांत उजो लागलो आनी स्फोटांचो आवाज आयलो.
थळाव्या खबरां प्रमाण, फारपेट सुरू जाले उपरांत थोड्याच वेळान क्रोकस सिटी हॉलांत स्फोट जालो. ह्या हल्ल्या उपरांत रशियेची सुरक्षा एजन्सी एफएसबीन सांगलें मॉस्कोच्या क्रोकस सिटी हॉलांत जाल्ल्या फारपेट प्रकरणा उपरांत कायद्याची अंमलबजावणी करपी संस्था गरजेचीं पावलां उबारतात.
कॉन्सर्ट हॉलांत लागिल्ल्या उज्याच्या घडणुकेचे व्हिडियो आनी फोटो सोशल मिडियाचेर व्हायरल जावपाक लागल्यात. ह्या व्हिडियोत हॉलांतल्यान पळून वचपाचो यत्न करपी लोकांची गर्दी दिसता. फारपेटांचो आवाज येता. तशेंच हांतूत एक हल्लेखोर दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
