शस्त्रां बाळगुप्यांचेर बारीक नदर जाय

भांगरभूंय | प्रतिनिधी

राजकी पक्षांच्या फुडाऱ्यांनी आपलो कोणूच वावुरपी शस्त्रांचे, हिंसेचे वाटेक वच्चो ना, हें पळोवचें पडटलें.

वेंचणुको तेंकल्यो काय हिंसाचाराच्या घडणुकांनी वाड जाता. गोंयांत तितली खरसाण जाणवना, पूण उत्तर, पूर्व भारतांत दरेके वेंचणुकेंत हिंसाचार दोन- चार फावटी तरी हाजेरी लावन वताच. देश स्वतंत्र जायत सावन हें चलत आयलां. पोरूं 8 जुलयाक अस्तंत बंगालांत पंचायत वेंचणुको जाल्यो. सात जिल्ह्यांनी हिंसाचार, उजो लावप, मतदान केंद्रां ताब्यांत घेवप, बोगस मतदान…. प्रसार माध्यमांनी तशें छापून आयलां. सरकारान सांगलें, 13 लोक मेले, तर खाजगी संघटना म्हणटात, 17 गेले. जखमींचो आंकडो कोणाक खबर ना. पूण तो तिपेटीन तरी आसतलो. ताचे भायर मोलादीक मालमत्ता (चड करून सरकारी) लासून गोबर जाली ती वेगळी. आंदोलना वेळार बंगालांत भौशीक बस लासपाची परंपरा आशिल्ली. आतांय आसतली. तीस, चाळीस वर्सां पयलीं पसून थंय हिंसाचार जाला. तेन्ना सत्ताधारी दावे पक्षे. ज्योती बसू मुख्यमंत्री. विरोधक काँग्रेस. आतां राजकी मळाचेर तृणमूल आनी भाजपा आसा. पूण हिंसाचार आदल्याच नेटान जाता. म्हणल्यार हें दायज एके पिळगे कडल्यान दुसरे पिळगे कडेन गेलां. पोरूं पंचायत वेंचणुकां वेळार लोकांक मरण आयलें तें फार लागून आनी बाॅम्ब फुटून. म्हणल्यार लोक शस्त्रां घेवन मेकळेपणी भोंवताले, असो अर्थ जालो. कायदो आनी सुवेवस्थेची ही धजा.
आमच्या गोंयांतूय पिस्तुलकार उणें नात. 4215 जाणां कडेन शस्त्रांचे परवाने आसात. तातूंतलीं 2580 शस्त्रां जमा करपा पसून भायर दवरल्यांत. तर 1553 आचारसंहिता लागू जावचे पयलींच संबंदितांनी जमा केल्यांत. 37 जाणांनी उपरांत. अजून 45 जाणांनी शस्त्रा जमा करूंक नात. लोकसभा वेंचणूक शांतीकायेन जावपाक जाय. नाका जाल्लो प्रकार घडपाक जायना, ते खातीर सरकारी यंत्रणा हो निर्णय घेता. जांची फांटभूंय गुन्यांवकारी ना, ते सोडल्यार हेर सगल्यांक शस्त्रां जमा करचीं पडटलीं. अर्थांत सुरक्षा दळां, पुलीस सोडून! शस्त्रां घेवन फिरपाचेर बंदी आसतली. खास करून रातच्या वेळार प्रचाराक भोंवतना थोडे सुरक्षे खातीर शस्त्र घेवन वतात. पूण थोडे तांचो हेर कामां खातीर वापर करतात. गोंयांत पसून वेंचणूक नासतना दांडे, तरसादी, हाॅकी स्टीक, वारांव घेवन गाडयेंत दवरून हेडपी लोक आसात. पुलीस बंदोबस्त आसतना ह्या लोकांक हें धाडस जाताच कशें तें कळना.
वेंचणुकांक लागून प्रत्येक गांवांत दोन गट जातात. एक अ पक्षाचो तर दुसरो ब पक्षाचो. तांचे थळावे फुडारी, वावुरपीय एकमेकांचे दुस्मान जातात. अर्थांत आडवाद आसतले. पूण वेंचणुकांच्या दिसांनी चडश्यांच्या मदल्यान उजो वचना. हे लोक शस्त्रां घेवन हेडपाक लागले जाल्यार हिंसाचाराची कीट खंयच्याय खिणाक पेटूं येता. ताकाच लागून जिल्होधिकाऱ्यान वेंचणूक आचारसंहिता लागू जायना बरोबर शस्त्रां जमा करपाक सांगिल्लीं. पूण अजून थोड्यांनी तीं करूंक नात. 16 मार्च ते जुनांत निकाल लागून वेंचणूक प्रक्रिया पुराय जाय मेरेन शस्त्रां घेवन फिरपाचे बंदी घाल्या. फक्त पिस्तुलांच जमा करपाक सांगूंक नात, तर सगले तरेचीं शस्त्रां, दारुगुळो बाळगुपाक, खंय व्हरपाक मेळचो ना. (सोऱ्याचेरुय बंदी घालपाक जाय. प्रचारा वेळार कोण टायट जाल्लो दिसल्यार ताका भितर उडोवपाक जाय. पूण तशी तरतूद घडये कायद्यांत नासतली.) भौशीक जाग्यांचेर, रस्त्याचेर, पाळणींनी शस्त्रां व्हरपाक मेळचीं नात. फक्त संरक्षण दिवपी जवान, पुलीस, सरकारी सुरक्षा कर्मचारी, बँकेचे सुरक्षा रक्षक वा जांकां कांय कारणांक लागून कायद्यान सूट दिल्या, तांचेर कांय बंधन आसचें ना. पूण हेरांक शस्त्रांक आफुडपाक लेगीत मेळचें ना. मात हो आदेश चालीक लागपाक जाय. अचकीत कोण तरी येवन हल्लो करून वच्चो ना, हाची जतनाय पुलिसांक घेवची पडटली.
फक्त सुरक्षा यंत्रणा, पुलिसांच्याच माथ्यार वेंचणूक शांतीकायेन, निश्पक्ष जावपाची जापसालदारकी ना. समाजानूय हातूंत योगदान दिवंक जाय. खास करून राजकी पक्षांच्या फुडाऱ्यांनी आपलो कोणूच वावुरपी शस्त्रांचे, हिंसेचे वाटेक वच्चो ना, हें पळोवचें पडटलें. विरोधक, सत्ताधारी आसलो तरी तो मनीस, गांवभाव, गोंयकार हें कोणें विसरूंक जायना. थोड्यांच्या काळजांत वर्सुयभर दुस्वास, खदखद आसता. मागीर मात्शे कोर्दीर आसल्यार पसून ते कितें करतात, तें तांचें तांकांच कळना. तेन्ना वेंचणुको, मागीर तीं पंचायतीची जावं वा लोकसभेची कसलीच वायट घडणूक घडनासतना जावप ही दरेकल्याची लागणूक. थोडे मेंदू घाणाक दवरतात, थोड्यांचो मेंदू अदीं मदीं लकणेंता, तांणी तर चड सादूर रावंक जाय!