भांगरभूंय | प्रतिनिधी
कोंकण रेल्वे पुलिसांची कामगिरीः दुबाविताक अटक
भांगरभूंय । प्रतिनिधी
मडगांवः रेल्वे स्टेशनार गस्त घालतना कोंकण रेल्वे पुलिसांनी दुबावीत तरेन भोंवपी एकल्याची चवकशी केली तेन्ना ताचे कडेन 8,806 रुपयांचो 61 लिटर सोऱ्याच्यो बाटल्यो सांपडल्यो. पुलिसांनी दुबावीत जयेश तांडेल (रा. मुंबय) हाका ताब्यांत घेवन सोऱ्याचे बेकोयदो येरादारी प्रकरणांत रितसर अटक केली आनी सोऱ्याचो सांठो जप्त केलो.
कोंकण रेल्वे पुलीस रेल्वे स्टेशन वाठारांत गस्त घालताले. त्या वेळार प्लॅटफॉर्म मं. 2 चेर एकलो दुबावीत तरेन भोंवतना तांकां दिसलो. ताणें एक बॅग हातांत धरिल्लें जाल्यार एक बॅग खांद्याक लायिल्लें. पुलिसांनी ताची वासपूस केली, तेन्ना ताचे कडेन प्लॅटफॉर्म तिकेट लेगीत नाशिल्लें. तशेंच तो पुलिसांच्या प्रस्नाक योग्य जापो दिवपाक शकलो ना. हे खातीर कोंकण रेल्वे पुलिसांनी ताची खोलायेन चवकशी केली. त्या वेळार ताणें आपलें नांव जयेश नरसिंह के तांडेल, आनी मुंबय दहीसरांत रावता अशें सांगलें. पुलिसांनी ताचे कडल्या बॅगांची तपासणी केली तेन्ना तातूंत सोऱ्याच्यो बाटल्यो सांपडल्यो. पुलिसांनी दुबावीत जयेशाक पुलीस स्टेशनार हाडलो. ताची खोलायेन तपासणी केली तेन्ना ताचे कडेन ट्रीपल एक्साच्यो 24 बाटल्यो, रमाच्यो 2, व्होडकाच्यो 8, व्हिस्कीच्यो 2 जाल्यार ब्रॅँडीच्यो 191 असो वट्ट 61 लिटर 380 मिलि सोरो सांपडलो. बाजारांत त्या सोऱ्याचें मोल 8,806 रुपया इतलें जाता. कोंकण रेल्वे पुलीस निरिक्षक सुनील गुडलर हांच्या मार्गदर्शना खाला ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
