भांगरभूंय | प्रतिनिधी
काँग्रेसः सध्या कार्यक्षम लोकप्रतिनिधी, अधिकाऱ्यांचो उणाव
भांगरभूंय । प्रतिनिधी
म्हापशें: स्वामी ब्रह्मेशानंदचार्य हांणी कळंगूटेक थायलॅण्ड म्हणलें. हें सरकाराचें अपेस आसा, असो आरोप काँग्रेसीचे कळंगूट गट समितीन केला.
म्हापशेंच्या जिल्हो कार्यालयांत घेतिल्ले पत्रकार परिशदेंत प्रदेश युवा उपाध्यक्ष विवेक डिसिल्वा, राजेंद्र कोरगांवकार, कळंगूट गटाध्यक्ष लॉरेन्स सिल्वेरा, मुख्तार अहमद, नरेंद्र रायकार, राजू कांदोळकार, सचीन वेंगुर्लेंकार, पेर्पेटो फर्नांडीस आनी लुईझा रॉड्रिग्स हाजीर आशिल्ले.
विवेक डिसिल्वा हांणी सांगलें, सर्वसामान्यांक सादें घर बांदतना सरकारी यंत्रणां वरवीं कटकटीच्यो अटी घालतात, पूण दिल्ली सारकिल्ल्या प्रदेशांतल्या बिल्डर लॉबीक बिनधास्तपणान उंच इमारती बांदून दर्यादेगो काबार करतात. ताका लागून सरकारान हाची जाप दिवची आनी उपरांतूच लोकांक दर्यादेगांची राखण करपाचो सल्लो दिवचो. सध्या कार्यक्षम लोकप्रतिनिधी आनी अधिकाऱ्यांचो उणाव आसा. लोकांनी तांच्या बंडलांक बळी पडनासतना गांभिर्यान विचार करचो, असोय तांणी उलो मारलो. राजेंद्र कोरगांवकार हांणी सांगलें, कळंगूट हो थायलॅण्डा सारको दिसता, अशें हालींच स्वामी ब्रह्मेशानंदचार्य हांणी म्हणिल्लें. स्वामींची ही प्रतिक्रिया पळयल्यार सत्य अणभवाची जाणीव करून दिता. कारण कळंगूटे आयजूय दलाल उक्तेपणी शिंदळकी वेवसायाक उर्बा दितात. ड्रग्साचो वेव्हार व्हड प्रमाणार चल्ला. हेच खातीर कळंगूटेची प्रतिमा पेड्डेर जाता, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
