भांगरभूंय | प्रतिनिधी
मडगांव, प्रतिनिधी: रेल्वे स्टेशनाचे गस्तीचेर आसतना कोकण रेल्वे पुलिसांनी दुबावीतपणान भोंवपी एके व्यक्तीची चवकशी केली. तेन्ना तिचे कडल्यान ८८०६ रुपया मोलाचो ६१ लिटराच्यो सोर्याच्यो बाटल्यो सांपडल्यो. पुलिसांनी दुबावीत जयेश तांडेल (रा. मुंबय ) हाका अटक करून ताचे कडलो सोरो जप्त केलो.
पुलिसांनी रेल्वेस्टेशनाच्या वाठारांत गस्त घाली तेन्ना तांकां प्लॅटफॉर्म नंबर दोनाचेर एकटो भोंवतना दिसलो. ताचे कडेन खांदार एक आनी हातांत एक अशीं दोन बॅगां आशिल्लीं. चवकशी केली तेन्ना ताचे कडेन प्लॅटफॉर्म तिकेकूय नाशिल्ली. ताणें पुलिसांनी विचारिल्ल्या प्रस्नांक योग्य जापो दिवंक नात. ताका लागून पुलिसांक दुबाव मारलो. उपरांत बॅगां तपासलीं. तातूंत तांकां सोर्याच्यो बाटल्यो सांपडल्यो. पुलिसांनी दुबावीत जयेश हाका पुलीस स्टेशनांत हाडलो. चवकशे वेळार ताचे कडल्यान ट्रिपल एक्साच्यो २४ बाटल्यो, रमच्यो दोन, व्होडकाच्यो आठ, व्हिस्कीच्यो दोन जाल्यार ब्रँडीच्यो १९१ अश्यो वट्ट ६१ लिटर ३८० मिली सोरो सांपडलो. सांपडिल्ल्या सोर्याचें मोल ८८०६ इतलें जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
