भांगरभूंय | प्रतिनिधी
नवी दिल्ली, खबरां संस्था : एका काळार अरविंद केजरीवाल हांणी जांच्या नेतृत्वा खाला काम केलें, केंद्रांतल्या कॉंग्रेस सरकारा आड देशव्यापी आंदोलन उबें केलें त्या समाजसेवक अण्णा हजारे हांणी केजरीवाल हांकां जाल्ली अटक हे विशीं प्रतिक्रिया उक्तायली. दिल्लीचे मुख्यमंत्री अरविंद केजरीवाल हांकां बिरेस्तार २१ मार्चाक ईडीन अटक केली. सोरो धोरण घोटाळो प्रकरणांत अरविंद केजरीवाल हांची ईडीन चवकशी करपाक चालू केल्लें. हे चवकशे वेळार ईडीन केजरीवाल हांकां वट्ट णव फावटी समन्सूय धाडिल्लो. मात केजरीवाल चवकशेक वचूंक ना. तशेंच तांणी समन्साक जापूय दिवंक ना. निमाणें बिरेस्तारा रातची तांकां ईडीन अटक केली. हे फाटभूंयेर विंगड विंगड प्रतिक्रिया सुरू जाल्यो. राजकी मळार विरोधी पक्षांचे फुडारी खर उतरांनी हे कृतीचो निशेध करतात, जाल्यार दुसरे वटेन सत्ताधारी पक्ष अटक करपाक तेंको दिता. मजगतीं, केजरीवालाचे गुरू अण्णा हजारे हांणी हे अटकेचेर प्रतिक्रिया दिल्या.
अण्णा हजारे हांणी म्हणलें, अरविंद केजरीवाल हांकां अटक जाल्ल्याचें पळोवन खूब वायट दिसलें. अरविंद केजरीवाल हांचे सारको मनीस केन्ना तरी म्हजे वांगडा काम करतालो. आमी सोर्या आड आवाज काडिल्लो. तोच मनीस आतां सोरो धोरण करता, हें पळोवन म्हाका खूब वायट दिसलें. मात आतां आमी कितें करपाक शकतां? आमी सत्ते मुखार कांयच करपाक शकना. तांणी जर त्यो गजाली करूंक नाशिल्ल्यो (सोरो धोरण करप वा तथाकथित घोटाळे करप) जाल्यार आयज तांकां अटक जावची नासली. ताका लागून फुडें जें कितें जातलें तें कायद्यान जातलें, अशी आमी अपेक्षा करुया. तांचें कितें करपाचें तें सरकार पळयतलें.
अण्णा हजारे हे आदीं केजरीवाल हांचे गुरू आशिल्ले. अण्णा हजारेंचे जन लोकपाल चळवळींत अरविंद केजरीवाल मुखार आशिल्ले. मात आंदोलन चालू आसतना केजरीवालान राजकारणांत प्रवेश करपाचें थारायलें, देखून अण्णा हजारे आनी केजरीवाल हांचे मदीं फूट पडली. ते उपरांत दोगांयनी वाट बदल्ली. उपरांत केजरीवाल हांणी आम आदमी पार्टीची थापणूक केली आनी आतां दिल्ली आनी पंजाबांत हो पक्ष सत्तेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
