भांगरभूंय | प्रतिनिधी
न्यूयाॅर्क, खबरां संस्था ः इस्राएल- हमास झुजांत अमेरिकेन झुजबंदी करपाचो प्रस्ताव तयार केला. आनी संयुक्त राश्ट्रांच्या सुरक्षा मंडळाक (UNSC) धाडला. परराश्ट्र मंत्री अँटोनी ब्लिंकेन हांणी ही म्हायती दिल्या.
गाझा हांगा बेगोबेग झुजबंदी करपाचे 3 प्रस्ताव अमेरिकेन न्हयकारल्यात. माल्टान पयलेच खेपे नोव्हेंबर 2023 वर्सा हो प्रस्ताव मांडिल्लो. दुसरे खेपे युएईन डिसेंबर 2023 वर्सा आनी तिसरे खेपे फेब्रुवारी 2024 वर्सा उत्तर आफ्रिकेंतल्या आल्जेरियान प्रस्ताव मांडिल्लो. तिनूय खेपे अमेरिकेन व्हेटो वापरून प्रस्ताव न्हयकारले.
7 ऑक्टोबर 2023 सावन सुरू जाल्ल्या इस्राएल-हमास झुजांत आतां मेरेन 32 हजारां परस चड पॅलेस्टिन लोकांक मरण आयलां. तातूंत 13 हजारां परस चड भुरगीं आसात.
आमचो प्रस्ताव ओलिसांक सोडपाचेर केंद्रीत – ब्लिंकेन
अमेरिकेचे परराष्ट्र मंत्री अँटनी ब्लिंकन इस्राएल- हमास झुजाच्या संबंदांत मध्य उदेंतांतल्या देशांक भेट दिता. सध्या तो साउदी अरेबियांत आसा. साउदी अल- हदाथ चॅनलाक दिल्ले मुलाखतींत तांणी म्हणलें, आमी एक प्रस्ताव तयार केला. आनी तो UNSC क धाडला. हातूंत ओलिसांक सोडपाचो विचार करून बेगोबेग झुजबंदी करपाची मागणी केल्या. हेर देश हाका तेंको दितले अशी आमी पुराय आस्त बाळगितात.
व्हेटो म्हळ्यार कितें?
UNSC त पांच कायम वांगडी आसात. तातूंत अमेरिका, रशिया, ब्रिटन, फ्रांस आनी चीन हांचो आस्पाव आसा. फकत तांकां व्हेटो पॉवर आसा हें खूब म्हत्वाचें. ह्या 5 देशांच्या संमती बगर सुरक्षा मंडळ खंयचोय थाराव पास करूंक वा चालीक लावंक शकना. 5 वांगड्यांतल्या एका वांगड्यान लेगीत व्हेटो केल्यार हो प्रस्ताव न्हयकारतात.
हमास आतंकवाद्यांनी 234 लोकांक ओलीस दवरले
7 ऑक्टोबर 2023 दिसा इस्राएलाचेर जाल्ल्या हल्ल्यात गाझांत सुमार 234 लोकांक हमासच्या आतंकवाद्यांनी ओलीस दवरले. 24 ते 30 नोव्हेंबर ह्या काळांत युद्धविराम जाल्लो. हमास आनी इस्राएल सैन्यानी 7 दीस हल्ले थांबयले. ते उपरांत 107 ओलिसांक सोडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
