काणी काणी कोतवा – 20

भांगरभूंय | प्रतिनिधी

होलिका दहन कथा

हिरण्यकश्यपू एका राक्षसाचो पूत आशिल्लो. तांणे तपश्चर्या करून ब्रह्मा कडल्यान वरदान मेळयल्लें. हिरण्यकश्यपुचो भाव हिरण्याक्ष हांणी जेन्ना धर्तरी नश्ट करपाचो यत्न केलो तेन्ना विष्णू देवान वराह अवतार धारण करून ताचो नाश केलो. ताका लागून तिडकल्ल्या हिरण्यकश्यपुन विष्णू देवाचें आपल्या राज्यांत कोणूच नांव लेगीत घेवचो ना अशें सगळ्यांक ठाम पणान सांगून दवरिल्लें. हिरण्यकश्यपू स्वताक श्रेश्ठ समजतालो. तो देवांचो तिरस्कार करतालो.

पूण ताच्याच कुळांत जल्मल्लो ताचो पूत प्रल्हाद विष्णू देवाचो व्हड भक्त थारलो. प्रल्हाद हो भुरगेपणासावनूच दीस रात विष्णू देवाच्या नांवाचो जप करतालो. हें सगळें हिरण्यकश्यपूक मान्य नाशिल्लें. ताका हें सगळें पळोवन तिडक मारताली. देखून ताणें प्रल्हादाक ताचे पसून पयस करपाचो यत्न केलो. पूण ताका दर खेपो अपेस येतालें.

सगळे उपाय करून थकिल्ल्या हिरण्यकश्यपुक ताची भयण होलिका हिणें एक दीस येवन म्हणलें, भैय्या, तुका जे त्रास जातात ते म्हाका पळोंव नज जाल्यात. अग्नी देवान म्हाका वरदान दिलां की म्हाका उजो लासून उडोवपाक शकना. हांव अशें करतां, प्रल्हादाक घेवन हांव उज्यान बसतां. म्हाका वरदान आशिल्ल्यान हांव त्या उज्यान लासचें ना. प्रल्हाद मात लासून वतलो.

हें आयकून हिरण्यकाश्यपून सुकयल्ल्या लाकडांचें व्हडलें होमकण केलें. होलिका प्रल्हादाक मांडयेर घेवन त्या लाकडां मांडिल्ल्या होमखणाचेर बसली. होलिका आपल्याच वरदानाचे धुंदींत आशिल्ली. प्रल्हाद मात तिचे मांडयेर बशिल्ले कडेनूय विष्णूदेवाचोच जप करतालो. प्रल्हादाचे खर भक्तीक लागून सगळें उरफाटेंच घडलें. प्रल्हादाच्या जाग्यार होलिकाचीच कूड लासपाक लागली. तिचें आंग भगभगपाक लागलें. प्रल्हाद मात विष्णुचें नांव घेवपांत तल्लीन आशिल्लो. निमाणें होलिका त्या उज्यांत लासून गोबोर जाली आनी प्रल्हादाक मात उज्याच्या धगान एक फोड लेगीत येवंक ना. तो येद्या व्हडल्या होमकणांतल्यान वाटावलो.

तेन्नासावन होळी लासपाची परंपरा सुरू जाली. होलिका दहना फाटलो हेतू म्हळ्यार फट जळोवन सत्याचो उजवाड पातळावप. देखून होळी म्हत्वाची.