भांगरभूंय | प्रतिनिधी
म्हापशें, प्रतिनिधी ः थिवी सरपंचपदार व्यंकटेश शिरोडकार हांची विरोधा विणें निवड जाली. हे वेंचणूक प्रक्रिये वेळार ११ वांगड्यांतले पांच वांगडी हाजीर रावूंक ना.
फाटल्या दोन म्हयन्यां सावन हें पद रितें आशिल्लें. तें भरपाक आयज २२ मार्चाक पंचायतीची विशेश बसका जाली. तातूंत ११ मदले स पंच वांगडी हाजीर आशिल्ले. शिवदास कांबळी, मायकल फर्नांडीस, गीता शेळके, वेंकटेश शिरोडकार, हर्षता कळंगुटकार आनी प्रिती आरोलकार. जाल्यार अर्जुन आरोसकार, सुनिता साळगांवकार, तुळशीदास शिंदे, समिक्षा मयेंकार आनी शिवराम परब हे पंच वांगडी गैरहाजीर रावले.
व्यंकटेश शिरोडकार हांचो एकूच अर्ज दाखल जाल्ल्यान निर्वाचन अधिकार्यांनी तांची विरोधा विणें निवड जाल्ल्याची घोशणा केली. निर्वाचन अधिकारी म्हणून गटविकास अधिकारी कार्यालयाचे मुरारी वराडकार हांणी काम पळयलें. तांकां पंचायत सचीव अमित प्रभू यांनी सहकार्य केले.
मजगतीं, फाटल्या २४ जानेवारीक तेन्नाचे सरपंच अर्जून आरोस्कार हांचे आड अविश्वास थाराव मंजूर जाल्लो. हें रितें पद भरपा खातीर पंचायत खात्यान वेळ काडिल्ल्यान पंचायतीच्या सत्ताधारी गटान मुख्यमंत्री तशेंच मुखेल सचीव आनी हेरांक फाटल्या ७ मार्चाक निवेदन सादर केल्लें.
गोंय पंचायत राज्य कायद्या प्रमाण ६० दिसां भितर सरपंच वा उपसरपंच पद भरचें पडटा. २३ मार्च दिसा ही मुजत पुराय जाल्ल्यान कायद्याचो अपमान जावचे पयलीं सरपंच पदा खातीर वेंचणूक घेवची, अशी मागणी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
