भांगरभूंय | प्रतिनिधी
वाळपय, प्रतिनिधी : लोकसभा वेंचणुकेचे फाटभूंयेर वाळपय नगरपालिका वाठारांतले सगळे बॅनर्स, पोस्टर्स काडून उडयले. ज्या बॅनर्स आनी पोस्टरांवचेर लोकनियुक्त राजकारण्यांचे फोटो आसात ते काडले. ह्या म्हालाचे वेंचणूक अधिकारी तशेंच उपजिल्होधिकारी निलेश धायमोडकार हांच्या निर्देशा प्रमाण बॅनर्स काडले. मात ज्या बॅनरांची परवानगी घेतल्या ते मात काडूंक नात.
हे विशीं चड म्हायती अशी, येवपी लोकसभा वेंचणुकेचे फाटभूंयेर आचारसंहिता लागू केल्या. हाका लागून मतदारांक आकर्शीत करपी आनी मतदारांचेर प्रभाव घालपी बॅनर्स आनी पोस्टर्स धाडपाची प्रक्रिया आचारसंहिते खाला येता. ताका लागून तें काडप सामकें गरजेचें. वेंचणुकेचे फाटभूंयेर हाचो प्रभाव पडचो न्हय आनी मतदार भ्रमीत जावचे न्हय देखून ही प्रक्रिया हातांत घेतल्या. हाची अंमलबजावणी नगरपालिका वाठारांत केल्या. मुख्याधिकारी सूर्याजीराव राणे हांणी दिल्ले म्हायती प्रमाण, आचारसंहितेची अंमलबजावणी नगरपालिका वाठारांत केल्या. नगरपालिकेच्या कामगारांचो वापर करून सगळे तरेचे बॅनर्स, पोस्टर्स आनी हेर जायरातींचे तखटे काडल्यात. हे विशींचे निर्देश वेंचणूक अधिकार्यांनी दिल्यात. ताची अंमलबजावणी केल्या. हाका लागून मतदाना मेरेन खंयचेय तरेची जायरात जांचेर फोटो आसतले तांचो वापर करपाक मेळचो ना. अशें केल्यार आचारसंहितेचो भंग जावपाक शकता. हाका लागून नगरपालिका हे विशीं जतनाय घेता. सगळ्यांनी हाका सहकार्य करचें अशी मागणीय तांणी केली.
वाळपयच्या बाजारांत विवीध जायराती, देवस्थानाच्यो कार्यावळी, समाजीक संस्थांच्यो कार्यावळी हे विशींचे पोस्टर्स आनी बॅनर्स लायतात. ते लावचेच. मात तांचेर लोकनियुक्त प्रतिनिधींचो फोटो वापरचो न्हय. तशें जाल्यार आचारसंहितेचा भाग म्हणून ते काडटले, अशें मुख्यधिकार्यांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
