भांगरभूंय | प्रतिनिधी
जयपूर, खबरां संस्था: जयपूराक जेवण रांदतना सिलिंडराक उजो लागिल्ल्यान पुराय कुटूंब जळून गोबोर जालें. ह्या अपघातांत तिगा भुरग्यांकूय मरण आयलें. पुलिसांनी दिल्ले म्हायती प्रमाण, कुडीच्या दारांत सिलिंडर आनी स्टोव्ह दवरिल्लो. ताका लागून कोणाकूच भायर धांवपाक संद मेळूंक ना. ही घडणूक बिरेस्तार सकाळीं साडेसात वरांचेर विश्वकर्मा पुलीस स्टेशन हद्दींतल्या जैसल्या गांवांत घडली.
हे घडणुकेची म्हायती मेळटांच पुलिसांचो पंगड ७.४० वरांचेर घडणुके सुवातेर पावलो. तेन्ना घरांत एक सिलिंडर जळटा हें तांकां दिसलें. कुडीचें दार बंद आशिल्लें.
उजो पालोवपी दळाचे मजतीन उज्याचेर नियंत्रण मेळोवन जळिल्ल्यो कुडी भायर काडल्यो. राजेश (२६), ताची बायल रुबी (२४), इशू (७), दिलखुश (२) आनी खुशमणी (४) हांका हे दुर्घटनेंत मरण आयलें. हें कुटूंब मोतिहारी (बिहार) हांगचें हांगा तें एके भाड्याचे कुडींत रावतालें.
उजो सिलिंडराच्या रेग्युलेटराच्या पॅनलांतल्यान भायर आयिल्लो. ताका लागून उजो पुराय कुडींत पातळ्ळो. उज्या पसून स्वताक वाटावपाक राजेश कुडीच्या एका कोनशाक बसलो. मात ताकाय मरण आयलें.
सकाळींच सिलिंडर बदलिल्लो
राजेश हांच्या शेजराक रावपी अर्जून हांणी सांगलें, राजेशान सकाळींच सिलिंडर बदलिल्लो. रेग्युलेटर योग्य तरेन बसूंक नासतलो. ताका लागून गळती जावन उजो लागलो. कांय खिणांतूच उजो पुराय कुडींत पातळ्ळो. घडणुके उपरांत उजो पालोवपी दळाच्यो दोन गाडयो घडणुके सुवातेर दाखर जाल्यो. सुमार अर्दे वरान उजो नियंत्रणांत आयलो.
मजगतीं, राजेश एका कारखान्यांत काम करतालो. सुमार ४-५ म्हयन्यां सावन हें कुटूंब हांगा रावतालें. कांय दिसांची सुटी घेवन हें कुटूंब बिहाराक गेल्लें. कालूच सांजेवेळार तें परतल्ले. आयज सकाळीं ही घडणूक घडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
