भांगरभूंय | प्रतिनिधी
कोरगांव, बातमीदार: हालींच मांद्रेंच्या स्वराज्य संस्थांच्या वांगड्यांनी मांद्रें सरपंच प्रशांत नायक हांची भेट घेतली. मांद्रें गांवांतलीं विवीध कामां आनी बेकायदेशीरपणान जावपी कामां आड दखल घेवचे खातीर मांद्रेंच्या स्वराज्य संस्थांच्या वांगड्यांनी सरपंचाक निवेदन पत्र दिलें. ह्या वेळार मांद्रेंचे आदले सरपंच विश्वनाथ शिरोडकार, तुषार गोवेकार, प्रसाद शाहपूरकार, संदेश सावंत, जगन्नाथ पार्सेकार आनी हेर हाजीर आशिल्ले.
आतां आस्वासनां नाका, कामां आनी कारवाय केल्ली जाय
आदल्या सरपंचांनी फकत आस्वासनां दिलीं. कामां कांयच करूंक ना. गांवांत जायतीं बेकायदेशीरपणान कामा चालू आसात ताचे कडेन सरपंचान लक्ष घालचें. तशेंच लोकांचे प्रस्न जाणून घेवन ताचेर कारवाय करची. आतां आमकां आस्वासनां नाका. कामां आनी कारवाय केल्ली जाय, अशें स्वराज्य संस्थांचे पदाधिकारी जगन्नाथ पार्सेकार हांणी म्हणलें.
गांवांत जायत्यो समस्या आसात. थळावे रस्त्या कुशीक गाडयो लायतात. आदल्यो गाडयो रस्त्या कुशीक दवरतात. तशेंच रस्त्याचे देगेक गाडे लायतात. ताका लागून येरादारीची कोयंडी जाता. ही हांगची सगळ्यांत व्हडली समस्या जावन आसा. लोकांनी वेवसाय करचो. मात ताचो त्रास हेरांक जावचो न्हय हाची जतनाय घेवची, अशें मांद्रेंचे आदले सरपंच विश्वनाथ शिरोडकार हांणी सांगलें.
मांद्रें गांवांतले बेकायदेशीर वेवसाय आडायतलों: सरपंच नायक
आयज मेरेन मांद्रें पंचायतींतले सरपंच हे संस्थे वांगडा आशिल्ले. हाचे फुडेंय रावतले. आपूण असल्या बेकायदेशीर वेवसायांक तिगपाक दिवचो ना. हाचेर कारवाय जातली हें उतर दितां. तशेंच म्हाका थळाव्यांनी वेंचून काडला. तांचे खातीर वावुरतलों. आपूण सरपंच जावचो न्हय म्हणून कांय दिल्लीवाले म्हाका सकयल उडोवपाचो यत्न करताले. मात तांचे कडेन तें शक्य जालें ना. आपल्या फाटल्यान श्री देव गणेश, भुमिका देवी तशेंच थळाव्यांचो आशिर्वाद आसा. दिल्लीवाल्यांनी कितलोय यत्न केलो तरी तरी ते अपेशी थारतले. आपूण वेगळे तरेन काम करतलों. आपल्याक सरपंच पदाची आशा ना. आपूण पंच म्हणूनय काम करपाक शकतां. आपल्या १० य पंचांनी जी जापसालदारकी दिल्या ती हांव पाळटलों. मांद्रें गांवाची उदरगत होच आपलो ध्याच. आमदार जीत आरोलकार हांचेय सहकार्य आमकां मेळटा. तांकां विस्वासांत घेवन मांद्रें गांवांतले बेकायदेशीर वेवसाय आडायतलों, अशें आस्वासन प्रशांत नायक हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
