भांगरभूंय | प्रतिनिधी
मासीक पाळी नेमान आसत जाल्यार बायलेची भलायकीय बरी आसता. पूण आयची व्यस्त जीण, बदलपी जिणे पद्दत, ताण आनी ह्या सगळ्या गजालींक लागून मासीक पाळी उसरां येवंक शकता. चडशे फावटीं ती सुरू जावपाक कळाव जाल्यार गुरवारपणाक दोश दितात. तशेंच मासीक पाळयेक एक-दोन म्हयन्यां परस चड काळ कळाव जाल्यार अमेनोरियाची समस्या आसपाक शकता. ही समस्या तिगून उरल्यार स्त्रीरोग तज्ञ दोतोरा कडेन वचप गरजेचें. आतां मासीक पाळी येवपाक कळाव जावपाचीं कारणां कितें तें तज्ञां कडल्यान जाणून घेवया.
मासीक पाळीच्या दिसा सावन फुडले मासीक पाळयेचो पयलो दीस हो काळ एक चक्र अशें मानतात. मासीक पाळयेचें सामान्य चक्र सुमार २८ दीस आसता. एक सामान्य चक्र ३८ दिसां मेरेन आसूं येता. तुमचो पिरियड हाचे परस चड वा सामान्य दिसां परस चड आसल्यार मासीक पाळी उसरां आयिल्ल्याचें मानतात. वजनांत चड बदल जावप, हार्मोनल अनियमितताय आनी रजोनिवृत्ती कडेन वचपी चक्र हेंय हाचे फाटलें कारण आसूं येता.
हाका लागून मासीक पाळींत कळाव जाता
थायरॉयड
स्त्रीरोग तज्ञ डॉ. रिद्धिमा शेट्टी इंस्टाग्राम पोस्टांत म्हणटा, ‘थायरॉयड मासीक पाळींत नियंत्रण करपाक मदत करता. थायरॉयड हार्मोन चड वा उणें आसल्यार पीरियड चक्र चड ल्हव, जड वा अनियमीत जावंक शकता. थायरॉयडाक लागून मासीक पाळी कितलेशेच म्हयने वा ताचेपरस चड काळ थारपाक शकता, हे स्थितीक अमेनोरिया म्हण्टात.
प्रोलॅक्टिनाची पातळी चड
स्त्रीरोग तज्ञांच्या मतान मेंदवाच्या पिट्यूटरी ग्रंथींतल्यान प्रोलॅक्टीन हो हार्मोन स्रावीत जाता. प्रोलॅक्टीन हार्मोन दुदाक धरप, स्तनाच्या ऊतकांची उदरगत आनी दुदाची निर्मिती करपाक जापसालदार आसता. रगतांत प्रोलॅक्टिनाची पातळी सामान्या परस चड आसल्यार मासीक पाळी येवपाक कळाव जावं येता. ५०-१०० एनजी/एमएल इतली प्रोलॅक्टिनाची पातळी चड आसल्यार अनियमीत मासीक पाळी आनी वांझपण येवंक शकता. कांय वखदां, संसर्ग आनी ताण लेगीत प्रोलॅक्टीन हार्मोनाच्या स्रावाक उत्तेजन दितात.
हिमोग्लोबीन पातळी
थायरॉयड आनी प्रोलॅक्टीन हांचे वांगडा हिमोग्लोबीनाची उणी पातळी आसल्यार अंत्यगर्भाशयाचे वाडीचेर परिणाम जावं येता. हाका लागून पीरियड्स सुरू जावपाक कळाव जावं येता. हिमोग्लोबीन उणें आशिल्ल्यान कुडींत लोखण उणें जाता आनी ताका लागून मासीक पाळयेचेर परिणाम जावं येता. हाका लागून दुबळेंपण येता, जाका लागून मासीक पाळीक कळाव जावपाक शकता. सेगीत दोन म्हयन्यां परस चड काळ कळाव वा अनियमीत काळ आयल्यार, समस्या समजून घेवपा खातीर दोतोराचो सल्लो घेवप म्हत्वाचें.
ओबॅसीटी वा पोशणाचो उणाव
वजन चड वा ओबॅसिटी मासीक पाळीचेर परिणाम करपाक शकता. तुमचें वजन चड आसल्यार कुडींत इस्ट्रोजेन चड तयार जावं येता. बायलांच्या प्रजनन तंत्राचेर नियंत्रण दवरपी हार्मोनांतलो हो एक हार्मोन. इस्ट्रोजेन चड प्रमाणांत आसल्यार मासीक पाळयेचेर सरळ परिणाम जावपाक शकता. हाका लागून म्हयन्याक कळाव जावपाक शकता.
जोर आनी संसर्ग
खंयच्याय तरेच्या संसर्गाचो मासीक पाळयेचेर सरळ परिणाम जावपाक शकना. पूण जोराक लागून यूटीआय जाल्ल्यान पीरियड डिले जावंक शकता. यूटीआय जाल्ल्यान जावपी ताण तुमचे मासीक मासीक पाळयेचेर परिणाम करपाक शकता. तशेंच तुमची जिणे पद्दत ताण दिवपी आसल्यार ताण कॉर्टिसोल उत्पादन वाडयता. हाका लागून मासीक पाळी येवपाक कळाव जाता.
(चत्राय : वयल्यो सगळ्यो गजाली वाचकां मेरेन म्हायती म्हणून पावयल्यात. देखून तुमचे कुडी संबंदी कितेंय उपाय करचे पयलीं तज्ञ दोतोराचो सल्लो घेवप गरजेचें.)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
