भांगरभूंय | प्रतिनिधी
मडगांव, प्रतिनिधी : दक्षीण गोंय जिल्होधिकारी कार्यालयांतल्या भूंय नोंदणी खात्यांतले मुखेल सर्व्हेअर प्रसाद सावंत देसाय हांकां १८ मार्चाक मारपेट केल्ली. एका अनवळख्यान ‘आपले फायलीचें कितें जालें’ हें विचारीत वाद घालून मारपेट केल्ली. हे विशीं फातोड्डें पुलिसांनी आतां दुबाविताचें स्कॅच जाहीर करून लुक आवट नोटीस काडल्या.
सोमार १८ मार्चाक ही घडणूक घडली. दुबावितान कार्यालयांत वचून प्रसाद सावंत देसाय हांची भेट घेतली. उपरांत आपले फायलीचें कितें जालें, अशें देसाय हांकां विचारलें. प्रसाद हांणी फायलीचो नंबर विचारलो म्हणून दुबाविताक राग आयलो. ताणें प्रसादा कडेन वाद घालपाक सुरवात केली. रागान दुबावितान हातांत आशिल्ल्या हॅल्मेटान प्रसाद हांकां मारपाक सुरवात केली. ते जमनीर पडटकच तांकां खोटांनी मार घालो.
मडगांवचे सर्व्हे निरीक्षक चेतन जाधव हांणी प्रसाद हांकां वाटावपाक धांव मारली. इतल्यान हेर कर्मचारी थंय येतकच दुबावीत थंयच्यान पळ्ळो. दुबावीत दुचाकीन आयिल्लो. सुरक्षा रक्षण ताका धरपाक येता तें पळोवन तकलेक हॅल्मेट घालून तो पळून गेलो.
सावंत देसाय हांणी केल्ले कागाळी प्रमाण पुलिसांनी चवकशी करपाक सुरू केल्या. कार्यालयांतले सीसीटीव्ही बंद आशिल्ल्यान हे घडणुकेची फुटेज मेळप कठीण जालां. उपरांत दुबाविताचे दुचाकीच्या क्रमांका वयल्यान सोद घेतलो तेन्ना ती वार्काच्या ब्रँझ नील डिकॉस्टा हे बायलेच्या नांवाचेर आशिल्ल्यान तिणें ही गाडी विकिल्ल्याचें पुलीस चवकशे वेळार कळ्ळें. दुबाविताचो सोद घेवपाक पुलिसांनी दुबाविताचो स्कॅच जाहीर केला. तशेंच लुक आवट नोटीस जारी केल्या. दुबावीत ३५ ते ४० पिराये मजगतींचो आसा. तांणें दाढी, मिशयो वाडयल्यात अशें वर्णन पुलिसांनी केलां. जांकां दुबाविताची कितेंय म्हायती आसल्यार फातोर्डा पुलीस स्टेशनाक संपर्क करपाचो उलो मारला. हे विशीं पुलीस उपनिरीक्षक अमीन नायक फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
