भांगरभूंय | प्रतिनिधी
गोंयां खातीर उमेदवारांच्या खर्चाचेर 75 लाखांची मर्यादा
पणजी, प्रतिनिधी ः लोकसभा वेंचणुकेची कार्यावळ जाहीर जाल्ल्यान राजकी पक्षां कडल्यान प्रचाराक सुरवात जाल्या. प्रचारा खातीर उमेदवारांचेर खर्चाची मर्यादा आशिल्ल्यान स्टेज, लावडस्पीकर, बॅनर, फ्लॅग हांचे दर निश्चित जाल्या. बसकांच्या लावडस्पीकरा खातीर दिसाक 3 हजार रूपया प्रमाण हिशोब वेंचणूक आयोग करतलो.
उत्तर गोंय जिल्होधिकाऱ्यांनी प्रचाराची उपकरणा तशेंच साधनांचे दर निश्चित करपी अधिसुचोवणी जारी केल्या. वेंचणूक आयोगान उमेदवारांच्या खर्चाचेर 75 लाखांची (गोंयां खातीर) मर्यादा घाल्या. ह्या मर्यादे भीतर उमेदवारांक खर्च करचो पडटलो.
वेंचणूक प्रचारा खातीर जाहीर बसका तशेंच बुथाचेर बसका जातात. हाचे खातीर स्टेज, खुर्च्यो, लावडस्पीकराची वेवस्था करची पडटा. स्टेज वा पोडियमा खातीर 880 रूपया चौखण मीटर प्रमाण खर्चाची आकारणी जातली. कपड्यांच्या झेंड्यांचो दर 150 रूपया चौमि प्रमाण जाल्यार हेर झेंड्यांचो दर 220 रूपया चौमि प्रमाण थारतलो. कलर पोस्टरा खातीर 18 रूपया जाल्यार काळ्या धव्या पोस्टरा खातीर 16 रूपया दर निश्चित जाला. व्हिडियो चित्रीकरणा खातीर दिसाक 3300 रूपया आनी हाय डिजीटल कॅमेराच्या आधारान चित्रीकरणा खातीर दिसाक 3390 रूपया प्रमाण दराची आकारणी जातली.
अल्पहार तशेंच खावपाच्या वस्तुंचे दर निश्चित केल्या. च्याचो दर 15 रूपया, कॉफीचो दर 20 रूपया जाल्यार सामोसाचो दर 15 रूपया निश्चित जाला. एक प्लेट शिवराक जेवण 125 रूपया जाल्यार नुस्त्यांच्या जेवणाचो दर 180 रूपया आसा. भाड्यांच्यो गाडयो, ड्रायव्हर हांचे दर येरादारी खात्यान निश्चित केल्ल्या प्रमाण आसा. उदकाची जोडणी, स्टेशनरी, झेरॉक्स हाचे वयल्या खर्चाच्या तपशीलाची लेगीत नोंद जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
