भांगरभूंय | प्रतिनिधी
उच्च न्यायालयाच्या गोंय खंडपिठान रद्द केली अवमान याचिका
पणजी, बातमीदार ः शेजारच्या कुर्डी पंचायती कडेन कबलात करून कोयर प्रस्नांचो तात्पुरतो सुटावो केल्ल्यान भाटी-सांगे पंचायतीच्या वांगड्या आड दाखल केल्ली अवमान याचिका मुंबय उच्च न्यायालयाच्या गोंय खंडपिठान रद्द केली. पूण कायम स्वरूपी मटेरियल रिकव्हरी फॅसिलिटी (MRF) बांदपा संबंदी मूळ याचिकेचेर सुनावणी चालू उरतली अशी म्हायती एड. जनरल देविदास पांगम हांणी दिली.
भाटी, बाणावली आनी हळदोणा ह्यो तीन पंचायती सोडल्यार गोंयांतल्या सगल्या पंचायतींनी कोयर विलो लावपा खातीर एमआरएफ शेड उबारल्यात. ह्या तिनूय पंचायतींच्या संबंदी उच्च न्यायालयांत सुनावणी चालू आसा. हांतूतल्या हळदोणा पंचायतीन उबारिल्ल्या शेडा संबंदीं कांय चुको आसात अशें प्रदुशण नियंत्रण मंडळान नदरेक हाडलां. उपरांत आयज हळदोणा पंचायतीन ह्यो चुको सुदारतले अशें स्पश्ट केल्या उपरांत खंडपिठान दोन सप्तकां भितर अहवाल सादर करपाक मंडळाक निर्देश दिला अशें एड. जनरल पांगम हांणी सांगलें.
मजगतीं, भाटी पंचायतीक शेड बांदपाक कळाव जाल्ल्यान तांणी एकठांय केल्ले पांच लाख रुपया उच्च न्यायालयान फाटल्या सुनावणेत गोठयल्ले. तशेंच पंचायत मंडळा आड अवमान याचिका दाखल केल्ली. पूण आयचे सुनावणे वेळार पंचायतीन यत्न सुरू केल्ल्याचें पळोवन न्यायालयान अवमान याचिका रद्द केल्या. तशेंच शेड बांदपा संबंदी कायम स्वरूपी उपाय करपाची अपेक्षा आसा. देखून मूळ याचिकेचेर सुनावणी चालू उरतली. सध्या तांणी शेड खातीर एक प्लॉट वेंचून काडला. पूण, तो ‘पर्यावरण संवेदनशील’ वाठारांत आशिल्ल्यान ताका रान खात्याची मान्यताय जाय. हे संबंदी फुडली सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
