भांगरभूंय | प्रतिनिधी
पणजी, बातमीदार ः ताळगांवचो गुन्यांवकार सूर्या उर्फ सूर्यकांत कांबळेचेर हल्लो केल्ल्या प्रकरणांत पणजी पुलिसांनी मास्टरमायंड आनी खांपो गुन्यांवकार रॉनी डिसोझा हाका अटक केल्या. ही घडणूक 11 डिसेंबर 2023 दिसा रातीं घडिल्ली. तेन्ना सावन रॉनी फरारी आशिल्लो.
11 डिसेंबर 2023 दिसा रातच्या वेळार टोंक- करंजाळे बुरखो घालून आयिल्ल्या अनवळखी हल्लेखोरांनी धारदार शस्त्रान सूर्याचेर हल्लो केल्लो. हांतूत सूर्या गंभीर जखमी जाल्लो ताका उपचारा खातीर जीएमसींत दाखल केल्लो. गुन्यांवकारींतल्यान सूर्याचें जायते जाणा कडेन दुस्मानकाय आशिल्ली. ताका लागूनच हो हल्लो जाल्ल्याचो दुबाव पणजी पुलिसांनी तेन्ना उक्तायल्लो. ते प्रमाण पुलिसांनी वाठारांतल्या सीसीटीव्ही कॅमेऱ्यांची तपासणी केली. उपरांत ह्या हल्ल्यांत नेण्ट्यां भुरग्यांचो आस्पाव आशिल्ल्याचें कळटकच पुलिसांनी दोगांक ताब्यांतय घेतले. ह्या भुरग्या मदलो एकल्याचो हाचे पयलीं एका गुन्यांवांत आस्पाव आशिल्लो. पुलिसांनी तांचो जबाबय घेतिल्लो. मजगतीं, ह्या हल्ल्याचो मास्टरमायंड रॉनी हाका पुलिसांनी अटक केल्या.
उत्तर गोंयांतल्या खांप्या गुन्यांवकारांचे वळेरेंत सूर्याचें नांव आसा. जिवें मारपाची धमकी दिवप, मारपेट करप, शस्त्र बाळगुवप, हल्लो करप ह्या सारक्या गुन्यांवाक लागून वेगवेगळ्या पुलीस स्टेशनांत ताच्या आड गुन्यांव नोंद आसात. ताचेर पणजी पुलीस स्टेशनांत चार तशेंच पेडणे, दिवचल, कळंगुटे आनी साळगांव पुलीस स्टेशनांत दरेकी एक मेळून वट्ट 8 गुन्यांव नोंद आसात.
तशेंच कळंगुटे हांगा कांय वर्सां आदी जाल्ले मारपेट प्रकरणांत सूर्याक अटकय केल्ली. ते उपरांत 2021 वर्सा ताळगांव हांगा पावलू क्रूझ हाचेर चाकू हल्लो केल्ले खातीर ताका अटक जाल्ली. ताळगांव सयत राज्यांत हेर वाठारांत जाल्ले गुन्यांवकारी प्रकरणांत सूर्याचे नांव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
