भांगरभूंय | प्रतिनिधी
पणजी, प्रतिनिधी: बायणा दर्यादेगेर थळाव्यांक कुशीक काडून भायल्या गांवांतल्यांनी वॉटर स्पोटर्स वेवसायाक सुरवात केल्या. ताका लागून थळाव्यांच्या गिरायकांचेर परिणाम जाला. भायल्या वॉटर स्पोर्टसवाल्यांक हांगा वेवसाय करपाक सुवात दिवंकना तरी लेगीत ते हांगा येवन बेकायदेशीरपणान वॉटर स्पोर्टस वेवसाय चलयतात, असो आरोप बायणाच्या वॉटर स्पोर्ट्स धनयांनी करून हो प्रस्न सुटावो करपाची मागणी मुख्यमंत्र्या कडेन केल्या.
बायणा दर्यादेगेर वेवसाय करपी थळावे वॉटर स्पोर्ट्स संघटनांनी आयज पर्वरे मंत्रालयांत मुख्यमंत्री दोतोर प्रमोद सावंत हांची भेट घेतली. आमी बायणाकार फाटल्या ७ वर्सां सावन वॉटर स्पोर्ट्साचो धंदो करतात. आमचो वेवसाय नोंद आसा. आतां टावट्सांनी आमचें नांव पिड्ड्यार केलां आनी कळंगुटे- बागा- हणजूण वाठारांतले लोक येवन हांगा बेकायदेशीरपणान वॉटर स्पोर्टसाचो धंदो करपांक लागल्यात. देखून थळावे वॉटर स्पोर्ट्स धनी शेणल्यात. तांकां बरेंच लुकसाण सोसचें पडटा, अशी कागाळ वॉटर स्पोर्टस संघटनेचे वांगडी जुझे फिलीप डिसोझा हांणी केल्या.
ह्या भायल्यांक वॉटर स्पोर्टसाचो वेवसाय करपाक सुवात दिवंक ना. ही सुवात फक्त थळाव्यांचीच. तरी लेगीत ते बेकायदेशीरपणान हांगा येवन आपलो वेवसाय चलयतात. बोगमाळो दर्यादेगेरूय अशेच तरेन बेकायदेशीरपणान वेवसाय चालू आसात. आमी हे विशींची याचिका उच्च न्यायालयांत घातिल्ली आनी ह्यो सगळ्यो बेकायदेशीर गजाली बंद करात म्हणून न्यायालयान ओर्द काडिल्ली, अशें तांणी सांगलें.
मुख्यमंत्री दोतोर प्रमोद सावंत हांणी पासियेंस काडून आमचे म्हणणें आयकून घेतलें आनी आमकां सतावपी सगळ्यो समस्या सोडोवपाचें आस्वासन तांणी दिलां, अशें डिसोझा हांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
