दोन भुरग्यांची गळो कापून हत्या, पुलिसांच्या एन्कावंटरांत आरोपीक मरण

भांगरभूंय | प्रतिनिधी

बदायूं, खबरां संस्था ः उत्तर प्रदेशांतल्या बदायूंनांत हेयर सलून चलोवपी मनशान दोन भुरग्यांचो गळो दाबून हत्या केल्ल्याची धक्को दिवपी घडणूक उजवाडाक आयल्या. मंगळारा सांजवेळा मंडई चौकी पसून कांय अंतराचेर ही घडणूक घडली. भुरग्यांच्या हें हत्येक लागून वाठारांत तणाव निर्माण जाल्लो. वाठारांत पुलीस बंदोबस्त तैनात केला.
हे घडणूकेत आयुश (12) आनी हनी (8) हांची धारदार शस्त्रान गळो चिरुन हत्या केली. तशेंच तांचे वांगडा खेळपी पियूश (7) ह्या भुरग्याचेर ताणें हल्लो केलो. ह्या हल्ल्यांत तो जखमी जालो. पुलिसांच्या म्हणण्या प्रमाण आरोपीचें नांव साजिद (25) अशें आसा.

नेमकें कितें जालें?

मंगळारा सांजवेळा बदायूच्या मंडई चौकी पसून कांय अंतराचेर आशिल्ल्या बाबा कॉलनींत ही घडणूक घडली. विनोद कुमार सिंह वेवसायान कंत्राटदार आसा जाल्यार ताची बायल घरांत पार्लर चलयता. जाल्यार विनोदच्या घरा मुखार साजिद सलून चलयता. मंगळारा सांजवेळा उसरां साजिद विनोदाच्या घरांत घुसलो. आपली बायले दुयेंत आसा अशें म्हणत ताणें भुरग्यांच्या आवय कडेन पांच हजार मागलें. उपरांत आरोपी टेरेसाचेर गेलो. आयुष आनी हनी दोगूय टेरेसाचेर खेळटाले. तेन्ना आरोपीन तांचेर धारदार शस्त्रांन हल्लो केलो हांतूत तांका मरण आयलें. जाल्यार तिसरो भुरगो पियूश उदक घेवन वयर गेल्लो तेन्ना आरोपीन ताचेरुय हल्लो केलो. हांतूत तो जखमी जालो.

पुलिसांच्या एन्कावंटरांत आरोपीक मरण

बदायूचे पुलीस अधीक्षक आलोक प्रियदर्शनी हांणी दिल्ले म्हायती प्रमाण भुरग्यांची हत्या केल्या उपरांत आरोपी साजिद थंयच्यान पळून गेलो. कांय वेळा उपरांत तो लागसारच्या रानांत लिपून रावला अशी म्हायती पुलिसांक मेळ्ळी. पुलिसांनी थंय वचून आरोपींक धरपाचो यत्न केलो. पूण ताणें पुलिसांचेर फारपेट केलो. ते उपरांत पुलिसांनीय आरोपीचेर फारपेट केलो. तांतूत आरोपीक मरण आयलें. मजगतीं, हत्या करपा फाटलें कारण अजून स्पश्ट जावंक ना. पुलिसांनी फुडलो तपास सुरु केला.