राजकारणांत गुन्यांवकार, काय….?

भांगरभूंय | प्रतिनिधी

फाटल्या कांय म्हयन्यांनी ईडी, सीबीआय खासदार, आमदारांचेर धाडी घालीत आसात. वराचीं वरां चवकशी करीत आसात. कांय जाणांक समन्सूय धाडल्यात. ही कारवाय फक्त विरोधी पक्षाच्या लोकप्रतिनिधींक सतावपाक करतात, असो आरोप जाता. तातूंत मात्तूय तथ्य ना, अशें म्हणपाक मेळचें ना. कारण बऱ्याच वर्सां सावन सत्ताधारी पक्ष सरकारी तपास यंत्रणांचो वापर (काय गैरवापर?) विरोधकांक मानसीक त्रास दिवपाक करीत आयल्यात. कोण हाका आडवाद आसचे नात. मात, एक गजाल सगलेच विसरतात. हे चवकशी जावपी लोकप्रतिनिधी खंय ना खंय तरी आडकल्ले आसतात, तांचेर गंभीर गुन्यांव आसतात. कांय जाण नोकरी, वेवसाय करिनासतना करोडांनी जमयतात, थोड्यांचेर आरोप सिद्धूय जातात. वांगडी लोकप्रतिनिधींक तांणी चुकीच्या कामांत मजत केल्ली आसता. तीं मागीर जाणां जावन आसूं वा नकळटां. सांगपाचें म्हणल्यार धाडी पडटात, अटक जाता, बंदखणींत वतात ते धुविल्ल्या तांदळा सारके चकचकीत नासतात. घराघरांनी म्हणटात, तश्यो पक्षापक्षांत मातयेच्योच चुली. थोड्या लोकप्रतिनिधींचेर तर दंगल करप, खून, बलात्काराचे पसून आरोप जाल्यात. आतां गुन्यांवकारांक सत्ते भायर दवरपाक भारतीय वेंचणूक आयोगान खर (?) भुमिका घेतल्या खंय. अशा उमेदवाराक राजकी पक्षान तिकेट दिल्यार ताका लोकांक जाप दिवची पडटली, असो नेम आयोगान चालीक लायला. मुखेल वेंचणूक आयुक्त राजीव कुमार हांणी हें जाहीर केलां.
गुन्यांवकारांक सत्ते भायर दवरप दिसता तितलें सोंपें न्हय. कारण तांकां भौस वेंचून दिता. बंदखणींतल्या गुन्यांवकारांक, लोकप्रतिनिधींक पसून लोकांनी खासदार, आमदार केल्ले आसात. आयोग दर वेंचणुकेक तशी घोशणा करता. केव्हायसी अर्ज सगल्या उमेदवारां कडल्यान भरून घेता. मागीर वेंचणूक रिंगणांत उरपी उमेदवाराची म्हायती जाहीर करतना ही गुन्यांवांची, संपत्तीची म्हायतीय लोकांक मेळटा. जर कोणाची गुन्यांवकारी फाटभूंय आसल्यार उमेदवारान ती तीन फावटी दिसाळीं, खबरां चॅनलांनी निवेदनां वरवीं जाहीर करप सक्तीचें केलां. आदीं खंयचे गुन्यांव नोंद जाल्ले, सध्या कितल्यो केशी चलतात, कोणे पुलिशेंत बी कागाळ केल्या, ह्या प्रस्नांच्यो जापो दिवच्यो पडटल्यो. राजकी पक्षांकूय ताकाच कित्याक तिकेट दिली, खंयच्या निकशांचेर, दुसरो कोण मेळूंक ना, हें सांगचें पडटलें. पूण हें सगले सोपस्कार करूनय राजकी पक्ष, मतदारांक तोच उमेदवार जाय जाल्यार वेंचणूक आयोग कितें करपाक शकतलो काय? कारण आयज कामां करपी उमेदवार लोकांक चड आवडटात, मागीर ते कितलेय व्हडले गुन्यांवकार आसूं वा तांचेर कितल्योय केशीं चलूं.
सध्या लोकसभा आनी राज्यसभेंतल्या 763 वांगड्यां मदल्या 360 म्हणल्यार 40 टक्के खासदारांनी आपले आड गुन्यांवकारी केशी आसात, अशें जाहीर केलां. असोसिएशन फाॅर डेमोक्रॅटीक रिफोर्मस (एडीआर) आनी नॅशनल इलेक्शन वाॅच (एनईडब्ल्यू) हांचो हो अहवाल. 194 म्हणल्यार 25 टक्क्यांचेर खून, खुनाचो यत्न अश्यो केशी आसात. सगल्यांत चड गुन्यांवकारी केशी आसात केरळांतल्या खासदारांचेर. 73 टक्के. मागीर बिहार, महाराष्ट्र 57 टक्के. तेलगंण 50 टक्के. खर गुन्यांव आशिल्ल्यां मदीं बिहार मुखार आसा. 50 टक्के. पक्षा प्रमाण पळयल्यार भाजपाच्या 385 मदले 139 (36 टक्के) खासदारांचेर गुन्यांव आसात. काँग्रेसीच्या 81 मदल्या 43 (53 टक्के) खासदारांचेर गुन्यांव नोंद जाल्यात. तृणमुलाच्या 36 मदल्या 14 (39 टक्के) खासदारांचेर गुन्यांव आसात. विशेश म्हणल्यार हे गुन्यांव खुद्द खासदारांनी प्रतिज्ञापत्रांत नोंद केल्यात. 32 खासदारांचेर खुनाचो यत्न, तर 21 जाणांचेर बायलां कडेन संबंदीत गुन्यांव आसात. संसदेंतल्या खासदारांची सरासरी मालमत्ता 38.33 कोटी रुपया आसा. तर गुन्यांव केशी जाहीर करपी खासदारांची मालमत्ता 50.03 कोटी रुपया आसा. जांचेर कांयच गुन्यांव नात तांची मालमत्ता 30 कोटी 50 लाख रु. आसा. सगल्यांत चड मालमत्ता तेलंगणच्या 24 खासदारां कडेन आसा. वट्ट 262.26 कोटी रु. तर आंध्राच्या 36 खासदारां कडेन 150.76 कोटी रु.
राजकारणांत गुन्यावकारांचो शेक आसप हो भौसाक आयज नवो उरूंक ना. आयचें राजकारण बदल्लां. तत्वांचें बी राजकारण आयज ना. आपलो फायदो कसो जातलो आनी विरोधकांचें लुकसाण कशें जातलें, हाचेर चडशे भर दितना दिसतात. मतदारांकूय आतां ताची संवय जाल्या. ताकाच लागून प्रामाणीक, सुशिक्षीत, तत्वांचें मनीस आयज राजकारणांत येशस्वी जाताच अशें नात…. आनी जालेच जाल्यार ते चड काळ तिगताच अशें ना. पूण, म्हणून बऱ्यां मनशांनी राजकारणा पसून पयस रावपाक जायना. तांणी तें शुद्ध करपाचोय आपले परीन यत्न करपाक जाय.