भांगरभूंय | प्रतिनिधी
भांगरभूंय । प्रतिनिधी
पणजीःसान्ताक्रुज मतदारसंघांतल्या इंदिरानगर- चिंबल हांगा सरकारी जमनीनत जी बेकायदेशीर घरां बांदल्यांत ती कायदेशीर करपा खातीर उपायो सोदून काडपाचें आस्वासन मुख्यमंत्री डॉ प्रमोद सावंत हाणी इंदिरानगरांत आयोजीत केल्ले विकसीत भारत संकल्प यात्रेंत उलयतना दिलें. घरा नियमीत करपाची समस्या सुटावी करपा खातीर आमी उपाय काडला मात ते खातीर मात्सो वेळ लागतोलो अशें तांणी सांगलें.
अल्पसंख्यांक चड प्रमाणांत आशिल्ल्या लोकांच्या मतांचेर नदर दवोरून मुख्यमंत्र्यांनी हें आस्वासन दिला. यात्रेंत थळावो आमदार रुदोल्फ फर्नांडीस, भाजपा गोंय प्रभारी आशिष सुद, राज्यसभा खासदार आनी प्रदेश भाजपा अध्यक्ष सदानंद शेट तानावडे, अर्फान मुल्ला आनी चिंबलचो सरपंच संदीप शिरोडकार हाजीर आशिल्लो. चिंबल पंचायत वाठारांत सरकारी जमनींत अतिक्रमणां करून बिगर गोंयकारांनी घरां बांदून ती बिगर गोंयकारांकूच विकल्यांत. ह्या घरांक चिंबल पंचायतीन चवकशी करनासतना लायटीची आनी उदकाची कनेक्शना घेवपाक घर नंबर दिल्यात. 1989 उपरांत ह्या सरकारी जमनींत अतिक्रमणां वाडलीं. बोगस सेल डीडां करून घरांंपरस्पर विकल्यांत असो आरोप रिव्होल्युशनरी गोवन्स पक्षात केल्या उपरांद ह्या बेकायदेशीर घरांचो प्रश्न उक्ताडार आयलो.
सान्ताक्रुजाची आदली आमदार व्हिक्टोरिया फर्नांडीस (मामी) हिच्या आमदारकीच्या कार्यकाळांत कांय घरां कायदेशीर केली, बाकीची घरां तशींच उरलीं. मामीचो पूत आनी सध्याचो आमदार रुदोल्फ फर्नांडीसान जिल्होधिकाऱ्या वांगडा बसका घेवंन घरां कायदेशीर कशीं करपाक जातात हे विशीं उपाय सोदून काडला अशें मुख्यमंत्री डॉ सावंतान यात्रेत उलयतना सांगलें. हें सगळें करपाक कळाव जातलो. रुदोल्फान भाजपांत येवपाकूच कळाव केलो. तो बेगीन आयिल्लो जाल्यार समस्या आतां मेरेन सुटावी जाताशिल्ली अशें मुख्यमंत्र्यान इंदिरानगरांतल्या लोकांक सांगलें.
सरकारी आनी कोमुनिदादीच्या जमनीत सुमार 1500 घरां बांदल्यांत. ती सगली सेटलमेंट आनी जमीन नोंदणी खात्यान नोंदीकृत केल्यांत. ज्या घरांची नोंद जाल्या ताका आमी बेकायदेशीर म्हणपाक शकनात अशें रुदोल्फ फर्नांडीसान सांगलें. 60 वर्सां सावन लोक ह्या घरांनी रावतात. जो कोणी गोयांत 15 वर्सां सावन राबितो करून आसा ताका कायद्या प्रमाण गोंयांतल्या राबित्याचो दाखलो दितात. जे कोण गोंयकार- बिगर गोंयकार अशें करतात ताणी हे समजून घेवचें अशें रुदोल्फान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.