भांगरभूंय | प्रतिनिधी
पणजी, बातमीदार: मुख्यमंत्री डॉ. प्रमोद सावंत हांकां १९ मार्च म्हळ्यार आयज मुख्यमंत्री पदाचीं पांच वर्सां पुराय जातात. घटक राज्या उपरांत ५ वर्सां पुराय करपी डॉ. प्रमोद सावंत हे पयलेच मुख्यमंत्री थारल्यात.
गोंयच्या मुख्यमंत्री पदार सेगीत रावपी डॉ. प्रमोद सावंत हे चवथे फुडारी. स. भाऊसायब बांदोडकार, स. शशिकलाताई काकोडकार, प्रतापसिंह राणे हांचे उपरांत डॉ. सावंत हांणी सगळ्यांत चड काळ राज्याच्या मुख्यमंत्री पदार सारून विक्रम केला. इतलेंच न्हय १९९० सावनच्या इतिहासांत सेगीत पांच वर्सां मुख्यमंत्री पदार राविल्ले ते बिगर कॉंग्रेस फुडारी थारल्यात. भाऊसायब ९ वर्सां १११ दीस, शशिकलाताई ५ वर्सां, प्रतापसिंह राणे १५ वर्सां ३२४ दीस मुख्यमंत्री पदाचेर उरल्यात. हातूंत आतां मुख्यमंत्री डॉ. प्रमोद सावंत हांच्याय नांवाचो आसपाव जाला.
१९ मार्च २०१९ दिसा डॉ. सावंत हांणी पयलेच फावट मुख्यमंत्री पदाचो सोपूत घेतलो. ४७ वर्सां पिरायेचेर तांकां पक्षान येदी व्हडली जापसालदारकी दिली. सगळीं संकश्टां, आव्हानां आनी आडखळींक येसस्वीपणान तोंड दिवन तांणी हीं पांच वर्सां पुराय केलीं.
मार्च २०२० ते मार्च २०२२ ह्या काळांत गोंयांत कोरोनाक लागून लॉकडावन आशिल्लो. २०२२ मार्चाक तो पुरायेन सोंपयलो. मागीर कसरत सुरू जाली. पर्यटना सयत सगळे वेवसाय परत कशे जाग्यार घालचे, वयर हाडचे हो प्रस्न सगळ्यांक पडिल्लो. दोन वर्सांच्या काळांत खुबश्या जाणांचीं कामां गेलीं. सगळेच अर्थीक नदरेन दुबळे जाल्ले. तेन्ना तांकां आदले दीस हाडपा खातीर मुख्यमंत्री डॉ. सावंत हांणी सगळे तरेचे यत्न केल्ले.
‘आत्मनिर्भर भारत’ करपा खातीर डॉ. सावंत हांणी गोंयाक स्वयंपूर्ण करपाचो संकल्प केला. जो मेरेन गोंयचो दरेक व्यक्ती स्वताच्या बळग्यार अर्थीक नदरेन सक्षम जायना तो मेरेन यत्न करतलों, हो संकल्प घेवन तांणी विवीध येवजण्यो चालीक लायल्यो. हाका लागून आयज गोंय स्वयंपुर्ण जावपाक लागलां. मुख्यमंत्री डॉ. सावंत हे तांच्या बर्या कामांक लागून लोकप्रीय थारल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
