भांगरभूंय | प्रतिनिधी
पणजीः “कोंकणी चळवळीच्या महाभारताचीं दोन पर्वां आसात. तातूंतलें एक शिक्षण पर्व. त्या पर्वांतले भिष्म पितामह म्हणल्यार सुरेशबाब.” अशा उतरांनी अॅड. उदय भेंब्रे हांणी सुरेश बोरकार हांचो भोवमान केलो. नामनेचे कवी सर्गेस्त नागेश करमली हांणी आपली घरकान्न सर्गेस्त मोहिनी करमली हांच्या नांवान दवरिल्लो 2023 चो प्रतिश्ठेचो ‘मोहिनी स्मृती पुरस्कार’ नामनेचे व्याकरणकार आनी कोशकार सुरेश बोरकार हांकां भेटोवपाचो सुवाळो पणजेंत जालो. त्या वेळार मुखेल सोयरे ह्या नात्यान उदय भेंब्रे उलयताले.
“सुरेशबाब हे गोंयचे शणै गोंयबाब” अशी वळख करून दितना तांणी मुखार सांगलें, जेन्ना पुस्तकां नाशिल्लीं तेन्ना हातान पुस्तकां बरोवन भुरग्यांक शिकोवंक दिवपाचें काम सुरेशबाबान केलें. शिक्षणा खातीर जीं साधनां जाय आशिल्लीं तीं निर्माण करप हें खूब कश्टाचें, खूब कठीण, खूब अभ्यासाचें काम. तें सुरेशबाब आनी ताच्या फुडारपणा खाला दुसऱ्या लोकांनी आपल्या गुणांचो उपेग करून ती साधना निर्माण केलीं. आनी ज्या साधनांचो उपेग आयज केजी धरून पीजी मेरेन जाता, तें व्याकरण आसूं, तें कोश वा दुसरे तरेन केल्लो वावर आसूं. शिक्षणांतल्या कोंकणीच्या महाभारत पर्वांत हें खूब गरजेचें आसलें.
कोंकणी आठवे वळेरेंत पावली, राजभास जाली, ते खातीर गोंय घटक राज्य जावंक पावलें. पूण जे कोंकणी भाशेक लागून हें सगळें घडलें हाची जाणीव जशी आसपाक जाय ती गोंयकारां मदीं तशी ना हाची खंत तांणी मुखार उक्तायली.
“मोहिनी पुरस्कारान सुरेशबाबा सारक्या म्हान व्यक्तीचो गौरव जाता तेन्ना ती संस्थाय म्हान जाता” अशें मानाचे सोयरे प्रभाकर भिडे हांणी म्हणलें. सुरेशबाब हे कोंकणी भाशेचे दोतोर. कोंकणी भाशेचेर संशोधन करून तांणी ती गिरेस्त केल्या, समृद्ध केल्या. कोंकणीचो प्रेशीत शणै गोंयबाबा वरी सुरेशबाबांची जीण म्हणजे थिकाथिकांतलीं कचकचून भरिल्लीं वज्रां अशें भिडे हांणी मुखार म्हणलें.
नागेशबाब हे मोटे चैतन्य, उर्जा, धीर आनी धाडस हांचें प्रतीक. कोंकणी चळवळींतलो एक मोटो गडगंज खांबो अशें मोहिनी पुरस्काराचे मानेली सुरेश बोरकार हांणी आपले उमाळे उक्तायतना सांगलें. आपलें राज्य आपले भाशेंत चलोवंक जाय हें अजून हांगाच्या लोकांक कळना. निमाणे कडेन कोंकणीच आमकां तारतली हें भान लोकांक आसपाक जाय अशें सांगलें.
कार्यावळीच्या अध्यक्षस्थाना वयल्यान उलयतना रामदास करमली हांणी ‘मोहिनी स्मृती पुरस्कार’ स्विकारिल्ले खातीर सुरेश बोरकार हांचे आभार मानले. तांणी मुखार म्हणलें, सुरेशबाबान जें कोंकणी व्याकरणाचें पुस्तक बरयलां, तें व्याकरण आपल्याक संगणकाचे भाशेंत बसोवपाक खूब बरें पडटा. ते भायर शब्दांच्या उत्पत्ती बद्दल सुरेशबाबांचो जो अभ्यास आसा, तोवूय वाखाणपा सारकोच, अशेंय तांणी मुखार म्हणलें.
कार्यावळीक आयोजक संजना पब्लिकेशन्साचे दिनेश मणेरकार हांणी येवकार दिलो. सुत्रसंचालन आनी उपकाराचें उलोवप स्नेहा सबनीस हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
