भांगरभूंय | प्रतिनिधी
मडगांव, प्रतिनिधी: रुमडामळ दवर्ली पंचायत वाठारांत बेकायदेशीर बांदकामां सध्या उबीं रावंक लागल्यांत. कांय सुवातांचेर कोमुनिदाद जागेय बळकायल्यात. हाचेर कारवाय करचे खातीर रुमडामळ पंचायतीच्या नागरिकांनी सरपंचांक घेराव घालो. बेकायदो बांदकाम आडावपाची नोटीस दिल्या. कोमुनिदाद आनी हाउसिंग बोर्ड अधिकारीणीकूय पत्र धाडटले, अशें पंच सैमुल्ला फनीबंध हांणी सांगलें.
रुमडामळ दवर्ली पंचायत वाठारांत आदीं दोन ते तीन ग्रामसभांनी पंचायत भागांतल्या बेकायदो बांदकामांचो विशय आयिल्लो. पंचायतीन वेळ काडपाचें धोरण स्विकारिल्ल्याचो आरोप करीत नागरिकांनी सरपंच मुबिना फनीबंध हांकां घेराव घालो. ह्या वेळार कांय जाणां आपले जागे सोडून कोमुनिदादच्या जाग्यार बांधकामां करतात. हें पंचायतीक सांगून लेगीत कांयच कारवाय जायना. तशें घर बांदतना अंडरग्रावंड खणपाचें काम चालू आसा. पंचायती, काम बंद करपाची नोटीस दिल्या अशें सांगता मात ह्या जाग्यार वचून पळोवणी केली तेन्ना काम आजूनय चालू आशिल्ल्याचें दिसता. हाचेर पंचायतीन कारवाय करूंक ना जाल्यार ग्रामस्थां कडेन कायदो हातांत घेतले बगर पर्याय उरचो ना, अशी शिटकावणी दिली.
ह्या वेळार पंच सैमुल्ला फनीबंध हांणी, कांय बांदकामां बेकायदेशीर आसात आनी कांय बेकायदेशीरपणान काम करप चालू आसा अशें पंचायतीच्या निदर्शनाक आयलां. सर्व्हे केल्या उपरांत हीं बांदकामां आडावन दवरल्यात आनी चलिल्लीं कामांय बंद केल्यांत. नागरिकांनी सांगिल्ले प्रमाण कांय जाणां कडल्यान काम सुरू केलां जाल्यार पळोवणी करतले. तशेंच बेकायदेशीर बांधकामांचेर कारवाये खातीर कोमुनिदाद आनी हावसिंग बोर्डची परवानगी गरजेची. तांकां बेकायदेशीर बांदकामांची म्हायती दितले, अशेंय स्पश्ट केलें.
ह्या वेळार ग्रामस्थांनी हावसिंग बोर्ड वाठारांतल्या रस्त्यांचेर उबारिल्ल्या बेकायदो बांदकामांचेर कारवायेची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
