भांगरभूंय | प्रतिनिधी
वाळपय, प्रतिनिधी: केरीचो नवो उदक शुध्दीकरण प्रकल्प सुरू जाल्ल्यान लोकांक ८ वरां पिवपाच्या उदकाची पुरवण सुरू जाल्या. प्रकल्प आठ दिसां आदीं सुरू जाला. मात सेगीत इबाडिल्ल्यान नागरिकांक उदकाची समस्या सोंसची पडटा. मात, केरी पंचायत वाठारांतल्या नागरिकांक आठ वरां उदकाची पुरवण जाता अशी म्हायती उदका पुरवण अधिकार्यांनी दिली.
हे विशी चड म्हायती प्रमाण, केरी पंचायत वाठारांत पुराय वेळार पिवपाच्या उदकाची सुविधा दिवपाची मागणी आशिल्ली. उल्लेख केल्ले सुवातेर उदकाचो प्रकल्प २ एमएलडी तांकीचो आशिल्लो. उदक शुध्दीकरण करपाची जॅक वेलची सुविधा मेळनाशिल्ली. आतां ती आसा. ते प्रमाण २ एम एल डी चड उदकाचो प्रकल्प उबारलो आनी ताचें उक्तावण हालींच मुख्यमंत्री डॉ. प्रमोद सावंत, मंत्री विश्वजीत राणे आनी आमदार डॉ. देविया राणे हांचे हस्तुकीं वर्चुअल पद्धतीन भिरोंड्यां केल्लें. ह्या वेळार नागरिकांक पुराय वेळ भरपूर उदक मेळटलें अशें जाहीर केल्लें.
सध्या आठ वरां उदकाची पुरवण
मजगतीं, मेळिल्ले म्हायती प्रमाण केरी पंचायत वाठारांतल्या सगल्या गांवांक आठ वरां उदकाची पुरवण सुरू आसा. सकाळीं पांच वरां आनी सांजवेळा तीन वरां, अशें उदका पुरवण अधिकारी सांगतात. पयलीं नागरिकांक फकत तीन वरां खातीर उदकाची सुविधा मेळटाली. आतां आनीक प्रकल्प बांदिल्ल्यान उदक पुरवण करपाची तांकूय वाडल्या. हाका लागून आठ वरां उदकाची पुरवण करप शक्य जाता अशें अधिकार्यांचें म्हणणें आसा.
चिखलाचें उदक येवप बंद
हाचे आदीं केरीच्या नागरिकांक नळांतल्यान चिखलाचें उदक मेळटालें. कारण जॅक वेलची सुविधा मेळनाशिल्ली. आतां ती चालीक लायिल्ल्यान चिखलाच्या उदकाची समस्या कायमची सुटल्या अशें अधिकार्यांनी सांगलें.
उदकांत लोखणाचें प्रमाण उणें जातलें
ह्या प्रकल्पाक अंजूणें धरणांतल्या न्हंयेंत प्रवाहीत जाल्लें उदक वापरतात. मात फाटल्या कांय वर्सां सावन ह्या उदकांत लोखणाचें प्रमाण तांकी परस चड आशिल्ल्याचें दिसून आयलां, देखून नागरिकांचे भलायकेक धोको निर्माण जालो. ताका लागून फाटल्या पांच वर्सां सावन ह्या प्रस्नाचेर नागरीकांनी जायते फावट तिडक उक्तायल्या. हो प्रस्न ग्रामसभेंत मांडलो आनी सरकाराच्या नदरे मुखार हाडलो. तेन्ना जॅकवेल सुविधा उपलब्ध जाल्ल्यान लोखणाचें तत्व प्रमाण तांकी परस उणें जातलें असो दावो अधिकार्यांनी उक्तायला.
८ दिसां सावन प्रकल्पांत सेगीत आडखळ
हो प्रकल्प नवो आसा. उदकाची पुरवण करपाक खुबशे सुवातींचेर पायपां घातल्यां. मात जायते फावट हीं पायपां इबाडटात. उदकाचीं पायपां घालपाच्या कामांकूय आडखळ निर्माण जाल्ली. ताका लागून कांय प्रमाणांत समस्या जाल्ल्याचें अधिकार्यांनी सांगलें. मात टप्प्याटप्प्यान त्यो पयस केल्यो. आतां कसलेच तरेची आडखळ निर्माण जावची ना असो दावो अधिकार्यांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
