भांगरभूंय | प्रतिनिधी
घटक राज्या उपरांत सेगीत सगळ्यांत चड तेंप उरिल्ले मुख्यमंत्री
पणजी, प्रतिनिधी : मुख्यमंत्री डॉ. प्रमोद सावंत हे आपल्या कार्यकाळाची फाल्या 19 मार्चाक पाच वर्सां पुराय करतात. मनोहर पर्रीकार हांच्या मरणा उपरांत 19 मार्च 2019 दिसा तांणी मुख्यमंत्रीपदाचो सोपुत घेतिल्लो. 2022 वर्सा जाल्ले विधानसभा वेंचणुके उपरांत मुख्यमंत्रीपदाचेर परतून तांचीच निवड जाली.
व्यवसायान आयुर्वेदिक दोतोर आशिल्ले डॉ. सावंत हे 2012 वर्सा सगळ्यांत पयलीं विधानसभेंत वेंचून आयले. 2017 चे वेंचणुकेंत सेगीत दुसरे खेपो ते वेंचून आयले. 2017चे वेंचणुके उपरांत राज्यांत परत भाजप आघाडीचें सरकार सत्तेर आयलें. सभापती पदाचेर तांची नेमणूक जाली. कांक्राच्या दुयेंसाक तत्कालीन मुख्यमंत्री पर्रीकार हे 17 मार्च 2019 दिसा संवसाराक अंतरले. उपरांत 19 मार्च 2019 दिसा रातीं कडेन डॉ. सावंत हांणी मुख्यमंत्री म्हूण सोपुत घेतलो. फेब्रुवारी 2022 त विधानसभा वेंचणुक जाली. भाजपाक 20 जागे मेळिल्ल्यान परत तांचीच विधीमंडळ फुडारी पदाचेर निवड जाली. 28 मार्च 2022 रोजी तांणी परत मुख्यमंत्रीपदाचो सोपुत घेतलो. घटक राज्य जाले उपरांत सेगीत पाच वर्सां मुख्यमंत्री पद सांबाळपी ते पयले मुख्यमंत्री आसा. हाचे पयली दिगंबर कामत हे सेगीत 4 वर्सां आनी 274 दीस मुख्यमंत्री आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
