भांगरभूंय | प्रतिनिधी
भंडारी समाजाचे बसकेंत घेतिल्ल्या थारावांक सगळ्यांचें समर्थन
दिवचल, प्रतिनिधी: हरवळें- सांखळेच्या श्री रूद्रेश्वर देवस्थानांतल्या कामांत हाचे फुडें कोणूच बिगर भंडारींचो हस्तक्षेप खपोवन घेवचे नात. तशेंच महाशिवरात्रे दिसा देवळांत बोवाळ घालप्यांचेर फौजदारी गुन्यांव दाखल करचो, असो थाराव हरवळ्यां जाल्ले भंडारी समाजाचे बसकेंत घेतलो. रूद्रेश्वर देवळाचे घटणे प्रमाण हें देवूळ आनी ह्या देवळांतल्या सगळ्या वेव्हारांचेर फकत भंडारी समाजाचोच अधिकार आसा. हेर समाजांक परंपरे प्रमाण आशिल्लो मान दितले. मात देवळाच्या वेव्हारांत आनी कामांत बिगर भंडारी समाजाचो कसलेच तरेचो हस्तक्षेप खपोवन घेवचे नात, असो थाराव घेतलो.
यशवंत माडकार आनी काशिनाथ मयेंकार हांचे अध्यक्षते खाला जाल्ले बसकेंत संजीव नायक, अॅड. अनिश बकाल, अमृत आगरवाडेंकार, किशोर नास्नोडकार, रोहन कळंगुटकार, बी. जे. नायक, सुभाष किनळकार आनी हेरांनी आपले विचार मांडले.
महाशिवरात्रे दिसा रूद्रेश्वर देवळांत बोवाळ घाल्ल्या सगळ्यांचेर देवळाचे समिती वतीन दिवचल पुलीस स्टेशनांत गुन्यांव दाखल करतले. असोय थाराव हे बसकेंत घेतलो. हो थाराव अॅड. अनिश बकाल हांणी मांडलो आनी संजीव नायक (पर्वरी) हांणी ताका अनुमोदन दिलें. थारावाक सगल्यांनी समर्थन दिलें.
देवळाचे घटणे प्रमाण सगळे अधिकार भंडारी समाजा कडेच आसात. तातूंत हेर कोणूच हस्तक्षेप करपाक शकनात. फुडेंय असो हस्तक्षेप खपोवन घेवचो न्हय, असो थाराव संजीव नायक हांणी मांडलो. ताका किशोर नास्नोडकार हांणी अनुमोदन दिलें. जाल्यार सगळ्यांनी हात वयर करून थारावाक समर्थन दिलें.
रुद्रेश्वर देव सगळ्या भक्तांचो. देवाचें दर्शन आनी पुजा, प्रार्थना सगळ्या समाजाच्या भाविकां खातीर उक्ती आसा. महाशिवरात्रे दिसा गर्भकुडींत देवाचो अभिशेक करपाक मेळटा. हाका देवस्थाना वतीन कसलेच तरेची हरकत ना. मात देवस्थानाच्या अधिकार कार्यांत बिगर भंडारी समाजान नाक खुपसल्यार तें केन्नाच सोंसून घेवचे नात अशें यशवंत माडकार हांणी सांगलें.
हे बसकेक दिवचल आनी सत्तरी म्हालांतल्या भंडारी समाजाच्या भावां सयत बाराय म्हालांतले भंडारी भाव हाजीर आशिल्ले.
भंडारी समाजाक २० टक्के आरक्षण
गोंयच्या भंडारी समाजाक २० टक्के आरक्षण मेळचें तशेंच ओबीसींची जनगणना करची असो थाराव उपेंद्र गांवकार हांणी मांडलो. ह्या थारावाकूय सगळ्यांनी समर्थन दिलें. तशेंच दर म्हयन्याचे पालखी मिरवणुकेक हरवळ्यां भंडारी समाजांतल्या लोकांनी व्हडा संख्येन एकठांय येवन उमेदीन हो सुवाळो मनोवचो. हे खातीर पुराय राज्यभर येरादारी वेवस्था आनी महाप्रसादाची वेवस्था करपाचें हे बसकेंत थारायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
