भांगरभूंय | प्रतिनिधी
पेडणें, प्रतिनिधी ः धारगळेंच्या एका पेट्रोल पंपाचेर काल रातीं अनवळखी मनशान 2 हजार रुपयांचें पेट्रोल घालून 500 रुपयांच्यो चार बनावट नोटी दिवन फटवणूक केली. हे संबंदी पेडणें पुलिशेंत कागाळ नोंद केल्या. पुलिसांनी सीसी टीव्ही वरवीं ताचो सोद घेवपाक सुरवात केल्या.
चड म्हायती प्रमाण, ही घडणूक काल रातीं घडली. एका मोटारीच्या ड्रायव्हरान गाडयेंत 2000 रुपयांचें पेट्रोल भरलें. उपरांत थंयच्या कामगाराक 500 रुपयाच्यो चार नोटी दिल्ल्यो. पेट्रोल पंपाचेर गर्दी आशिल्ल्यान कामगारान त्यो नोटीं सारक्यो पळयल्यो नात. उपरांत रातीं हिशोब दितना नोटीं नकली आशिल्ल्याचें कळ्ळें. ह्यो नोटी खऱ्यो 500 चें नोटींवरीच दिसताल्यो. पूण ताचेर भारतीय रिजर्व्ह बँक ऑफ इंडिया (Reserve Bank of India) बदला ‘भारतीय बच्चों की बँक’ आनी ‘children Bank of India’ अशें बरयल्लें आसा. हे संबंदी पेडणें पुलिशेंत कागाळ दाखल केल्या. पुलिसांनी पेट्रोल पंपा वयल्यान सीसीटीव्ही फुटेज घेवन गाडयेचो सोद घेवपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
