भांगरभूंय | प्रतिनिधी
नवी दिल्ली, खबरां संस्था ः देशांतल्या गांवगिऱ्या वाठारांनी लोकांचे वाडटें उत्पन्न आनी रस्त्यांचे उदरगतीक लागून शारां परस गांवांनी चड गाडयो खपपाक लागल्यात. हाकाच लागून गाडयो तयार करपी कंपनीं ल्हान शारांनी आपलें नेटवर्क वाडोवपाचेर लक्ष केंद्रीत करतना दिसता. चालू अर्थीक वर्सा 42 लाख गाडयो खपल्यात, फुडल्या एप्रील सावन सुरू जावपी 2024- 25 अर्थीक वर्सा गाडयांची विक्री 3- 5 टक्क्यांनी वाडटली असो वाहन उद्देगाचो अदमास आसा.
मारुती सुझुकी इंडियाचे वरिश्ठ कार्यकारी अधिकारी (मार्केटिंग आनी विक्री) शशांक श्रीवास्तव हांणी सांगलें, फाटल्या जायत्या वर्सां सावन गांवगिऱ्या वाठारांनी गाडयांची विक्री शारां परस चड आसा. कोविड काळांत शारांनी गाडयांचे विक्रेंत उणी वाड आशिल्ली जाल्यार तेच वेळार गांवगिऱ्या वाठारांनी सकारात्मक वाड दिसून आयली.
उद्देगीक पांवड्यार वट्ट कार विक्रेंत गांवगिऱ्या वाठारांचो 32- 33% वांटो आसा. फाटल्या चार वर्सांत मारुती सुझुकीच्या वट्ट कार विक्रींत गांवगिऱ्या वाठारांतल्या विक्रेचो वांटो 7 टक्क्यांनी वाडला. सध्या तो सुमार 45% आसा. 2018- 19 वर्सा तो 38% आशिल्लो. टाटा मोटर्स पॅसेंजर व्हेइकल्स आनी टाटा पॅसेंजर इलेक्ट्रीक मोबिलिटीचे एमडी शैलेश चंद्र हांणी सांगलें, ‘कंपनीच्या वट्ट कार विक्रेंतल्यान ग्रामीण वाठारांतले विक्रेचो वांटो 40% आसा. 2019-20 अर्थीक वर्साचे तुळेंत 2023-24 अर्थीक वर्सा गांवगिऱ्या वाठारांनी विक्रेचो आंकडो 5 पटींनी वाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
