भांगरभूंय | प्रतिनिधी
खबरां संस्था
नवी दिल्लीः श्रीयांक पाटील, मोलेनिक्सा आनी आशा शोभनाची बॉलींग आनी सोफी डेव्हीन आनी स्मृती मंधानाची बॅटींग हाच्या नेटार रॉयल चलेंजर्स बंगळुरू हांणी बायलांच्या प्रीमियर लीग क्रिकेट सर्तीचो (डब्ल्यूपीएल) किताब पयलेच फावट आपल्या नांवार केलो. नवी दिल्लींतल्या अरूण जेटली स्टेडियमाचेर जाल्ले फायनलींत तांणी दिल्ली कॅपिटल्स पंगडाक 8 विकेटींनी हारोवन व्हो मान मेळयलो.
ही मॅच उमळशीक वाडोवपी अशी जातली अशें दिसतालें मात. मालेनिक्सा, श्रीयांक आनी आशा ह्या त्रिकुटा सामकार दिल्लीचो डाव 113 धांवड्यांत सोपलो आनी बंगळुरूच्या स्मृती आनी डेव्हीन ह्या ओपनरांनी 7 ओव्हरींत 43 धांवड्यो केल्यो तेन्नाच मॅचीतली उमळशीक ना जाली. पंगडाक 82 धांवड्यांच्या सुरक्षीत सुवातेर व्हरून स्मृती मंधाना मिन्नू मणीच्या बॉलिंगेर कॅच आवट जालें. ताणे तीन चौक्यांनी 39 बॉलांत 31 धांवड्यो केल्यो. एलिसे पॅरी आनी रिचा घोशान तिसरे विकेटी खातीर 33 धांवड्यांची नाबाद भागिदारी करून 19.3 ओव्हरींत पंगडाक 8 विकेटींनी जैत मेळोवन दिलें. 37 बॉलांत 4 चौक्यांनी पॅरीन नाबाद 35 धांवड्यो केल्यो. रिचा जाय तेन्ना 14 बॉलांत दोन चौक्यांनी नाबाद 17 धांवड्यो केल्यो.
7 ओव्हरींत 43 धांवड्यो करून ओपनर कॅप्टन स्मृती मंधाना आनी सोफी डेव्हीन हांणी पंगडाच्या जैताचें ध्येय स्पश्ट केले. सलामीची ही जोडी फोडपाक दिल्लीची कॅप्टन मेन लेनींग हिणे पांच बॉलराक आरतून परतून बॉलींग दिली. मात ताचो परिणाम जालो ना. उरफाटें फॉर्मांत आशिल्ल्या डेव्हीनान 5 चौके आनी एका सक्यान 26 बॉलांत 32 धांवड्यो काडल्यो. ताका कॅप्टन मंधानान जाय तसो वांगडो दितना सादूरतायेन खेळपाक सुरवात केली. निमाणे शिखा पाण्डेक आपले तिसरे ओव्हरींत ही जोडी फोडपाक येश मेळ्ळें. बॅकफूट वचून खेळटना शिखाचो बॉल डेव्हीनाच्या पायांक लागलो आनी अंपायरान ताका एलबीडब्ल्यू केलें. 49 धांवड्यांत रॉयल चलेंजर्सांची पयली विकेट पडली.
दिल्ली 113 धांवड्यांत आवट
दिल्ली कॅपिटल्सान टॉस जिखून पयलीं बॅटींग करपाचो घेतिल्लो निर्णय घेतलो. कॅप्टन मेग लेनींग आनी शेफाली वर्मान डावाक सुरवात करून 64 धांवड्यांची खणखणीत सलामी दिली. सोफी मोलेनिक्सान शेफालीक कॅच आवट करून ही जोडी फोडली. शेफालीक अर्द शेंकडो करपाक स धांवड्यो जाय आशिल्ल्यो तेन्नाच तें आवट जालें. तीन सके आनी दोन चौक्यांनी 27 बॉलांत ताणे 44 धांवड्यो केल्यो. ह्या उपरांत डावांतल्या आठवे ओव्हरींत मोलेनिक्सान दिल्लीक एकाफाटल्यान एक अशें दोन व्हडले धपके दिले. जेमिमाह रॉड्रिग्ज आनी अॅलीस कॅप्सीन ताणे शून्याचेर क्लीन बोल्ड करून दिल्लीची स्थिती 1 आवट 64 वयल्यान 3 आवट 64 अशी केली. आशा शोभनान मारिझान कॅप (8) आनी जॉस जॉनासन (3) हांका कॅच आवट करून तांची स्थिती 6 आवट 81 अशी केली. टॉस जिखून पयलीं बॅटींग करपाचो मेन लेनींगाचो निर्णय दिल्लीच्या आंगलट आयलो हें ह्या वेळार दिसून आयलें.
पंगडाच्यो 74 धांवड्यो जाल्ल्यो तेन्ना लेनींगाक श्रीयांका पाटिलान एलबीडब्ल्यू केलें. ताणे 3 चौक्यांनी 23 बॉलांत 23 धांवड्यो केल्यो. श्रीयांकान मिनू मनीक ( द5)एलबीडब्ल्यू करून दिल्लीची स्थिती 7 आवट 87 अशी केली. राधा यादव (5) आनी अरुंधती रेड्डीन (10) 16 वे ओव्हरींत पंगडाचो शेकडो पुराय केलो. मात ते उपरांत तांकांय आवट करून आनी विकेटकीपर तानिया भाटियाक रिचा घोशा वरवी कॅच आवट करून श्रीयांकान दिल्लीचो डाव 18.3 ओव्हरींत 113 धांवड्यांत सोपयलो. शेफाली वर्मा आनी मेग लेनींग सोडल्यार दिल्ली कॅपिटल्याच्यो खेळगडी श्रीयांका आनी मोलेनिक्सा सामकार तिगपाक शकल्यो नात. श्रीयांकान 14 धांवड्यांत 4, मोलेनिक्सान 20 धांवड्यांत 3 आनी आशा शोभनान 14 धांवड्यांत 2 विकेटी घेतल्यो. मोलेनिक्सान चार बॉलांत 3 विकेटी घेवपाचो पराक्रम करून दाखयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
