भांगरभूंय | प्रतिनिधी
भांगरभूंय । खेळां मेज
पणजीः गोंय जीएसबी स्पोर्ट्स अॅण्ड चॅरिटेबल ट्रस्ट आनी गोंय सारस्वत समाजाच्या पालवान आयोजीत केल्ल्या आल्कॉन जीएसबी युनिटी करंर टी-20 क्रिकेट सर्तींत आयतारा काणकोण वॉरियर्स आनी रेंजर्स पंगडांनी जैत मेळयलें. काणकोणाचो हे सर्तींतलें हें पयलेंच जैत जाल्यार रेंजर्सान सेगीत दुसऱ्या जैताची नोंद केली. दोनूय मॅची मडगांवच्या एमसीसी मैदानार जाल्यो.
सर्तींतल्या णवे मॅचींत काणकोण वॉरियर्सान आयतारा अंत्रूज रायझींग स्टार्साक 69 धांवड्यांनी हारयलें. काणकोणच्या आघाडेच्या फळयेंत विराज पुराणीक (3), कॅप्टन सुकृत पै (36), प्रणव कामत (35) आनी अमेय राजाध्यक्ष (35) हांणी पंगडाक 20 ओव्हरींत 6 आवट 160 धांवड्या मेरेन व्हेलें. ह्या लक्ष्याचो फाटलाव करतना रायझींग स्टार्स 17 ओव्हरींत 111 धांवड्यां मेरेन मजल मारपाक शकलो. तांच्या निखील कामतीन एकोडी झूज दिवन 25 धांवड्यो केल्यो. मॅन ऑफ दी मॅच थारल्ल्या प्रणव कामतीन 14 धांवड्यांत 2 विकेटी घेतल्यो.
सर्तींतल्या धावे मॅचींत रेंजर्सान मडगांव सुपर स्ट्रायकर्साक 11 धांवड्यांनी हारयलें. 28 बॉलांत 40 धांवड्यो करपी रेंजर्साचो सिद्धीत रायतुरकार मॅन ऑफ दी मॅच थारलो. ताचे शिवाय समर दुभाषी (35) आनी यश प्रभुगांवकार (32) हांणी मोलाचें योगदान दिलें. जैताच्या लक्ष्याचो फाटलाव करतनना सुपर स्ट्रायर्स पंगडाच्या शिवम आमोणकार (39) आनी साहिल मांद्रेकार (33) हांणी दुसरे विकेटी खातीर 65 धांवड्यांची भागिदारी करून पंगडाक बरे स्थितींत व्हेलें मात उपरांत ताचो डाव 5 आवट 109 असो गडगडलो. तांणी 20 ओव्हरींत 7 आवट 160 धांवड्यो केल्यो.
सर्तीच्या दुसऱ्या सप्तकांत अ गटांत म्हापशें ड्रीम क्रशर्स (4), रेंजर्स (4) आनी डेझर्टस् अँड मोअर अव्हेंजर्स (2) हे पंगड पयल्या तीन नंबराचेर आसात. तांच्या फाटल्यान मडगाव रॉयल्स (0), मडगांव सुपर स्ट्रायकर्स (0) आनी मठग्राम वॉरियर्स (0) हे पंगडा आसात. ‘ब’ गटांत अंत्रुज स्ट्रायकर्स (4) पयले सुवातेर आसा. त्या उपरांत सिंक रेंजर्स (2), नायट आर्चर्स (2), काणकोण वॉरियर्स (2) हांचो नंबर लागता. सीक्यूएस स्कोअरिंग विलोज आनी अंत्रुज रायझिंग स्टार्स हांणी अजून गुण खातें उगडलें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
