भांगरभूंय | प्रतिनिधी
खबरां संस्था
नवी दिल्लीः लोकसभा वेंचणुकांक लागून इंडियन प्रीमियर लीग (आयपीएल) सर्तीच्या दुसऱ्या टप्प्यांलल्यो कांय मॅची संयुक्त अरब अमिरातींत (यूएई) खेळयतले अशी चर्चा सुरू आसतनाच आयपीएलाचो अध्यक्ष अरूण धुमला हांणी ताका पूर्णविराम दितना पुराय सर्त देशांतूच जातली अशें स्पश्ट केलां. 22 मार्चा सावन हे सर्तीक पोरूंचो वस्ताद चेन्नय सुपर किंग्ज आनी रॉयल चलेंजर्स बंगळुरू हाचे मदले मॅचीन जातली.
बीसीसीआयन कांय दिसां आदी आयपीएलाच्या पयल्या 17 दिसांचें वेळापत्रक जाहीर केल्लें. ते मजगतीं 21 मॅची जातल्यो. त्या उपरांतच्यो कांय मॅची यूएईत जातल्यो अशी चर्चा आशिल्ली. आमी बाकीच्या मॅचींचें वेळापत्रक रोखडेच जाहीर करतले. आयपीएल भारता भायर व्हरचे नात हे नक्की अशें धुमल हांणे सांगलें. बीसीसीआयचो सचीव जय शहा हाणे लेगीत लोकसभा वेंचणुकांचो आयपीएलाच्या आयोजनाचेर परिणाम जावचो ना अशें सांगल्लें.
आयपीएलांतल्या कांय पंगडांनी तांच्या खेळगड्यांक ताचे पासपोर्ट सादर करपाक सांगिल्ल्याचें सांगताले. ताका दुसऱ्या आयपीएलाच्या दुसऱ्या पट्ट्यांतल्यो मॅची भारता भायर जावपाक शकतात अशी चर्चा सुरू जाल्ली. हाचे पयलीं करोना म्हामारीकलागून 2020 वर्सा पुराय सर्त आनी 2021 वर्सा आयपीएलाच्या दुसऱ्या टप्प्यांतल्यो मॅची अमिरातींत खेळयल्लो. अदूं लेगीत कांय मॅची दुबयत जातल्यो अशें सांगताले. मात धुलम हांणी तशें कांय जावचें ना अशें सांगलां.
लोकसभा वेंचणुकांचो आयपीएलाचेर परिणाम जाल्ल्याचें हाचे पयलीं पळोवपाक मेळल्लें. 2009 च्या लोकसभा वेंचणुकां खातीर आयपीएलाचो पुरास सिझन दक्षीण आफिकेंत जाल्लो. आयपीएल भारता भायर पयलेच फावट जाल्ली. 2014 च्या वेंचणुकां वेळार सुरवातीच्या 20 मॅचींचें आयोजन अमिरातींत केल्लें. 2019 वर्सा मात लोकसभा वेंचणूक आसतनाय पुराय आयपीएल देशांतूच जाल्ली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
