भांगरभूंय | प्रतिनिधी
पेडणें, प्रतिनिधी : ऑगस्ट २०२३ सावन मांद्रें मतदार संघांतल्या रस्त्यां कुशीक खणलां. हे रस्ते खणून हांगा जमनी पोंदच्यान वीज केबल घाल्यात. मात हें काम जावन लेगीत आजूनय ह्या रस्त्यांचें डांबरीकरण जायना. एके वटेन कांय रस्त्यांचेर डांबरीकरणाचें काम सुरू आसा. दुसरे वटेन तुयें आयटीआय ते हॉस्पिटल मेरेन देड किलोमिटरच्या अंतरा मेरेनची रस्त्याची स्थिती भौशीक बांदकाम खातें, उदका विभागान बाबत करून उडयल्या.
तुयें आयटीआय वाठारांत मांद्रें मतदारसंघा खातीर खास ३० एम एल डी उदक शुद्धीकरण प्रकल्प उबारता. ताका उदकाचें पायप जोडपा खातीर फाटल्या म्हयन्यांत तुयें आयटीआय वाठारांत उदकाचीं पायपां घालपाक सुरवात केल्ली. तेन्ना कंत्राटदारान १०० मिटर रस्तो खणून तातूंत उदकाचीं पायपां घाले उपरांत रस्तो पुरयतले, ताचें डांबरीकरण करतले आनी मागीर परत शंभर मिटर रस्तो खणून ताचे फुडलें डांबरीकरण करतले असो अलिखीत करार केल्लो. तशेंच कंत्राटदार आनी आमदार जीत आरोलकार हांणीय नागरिकांक तशे तरेचें आस्वासन दिल्लें. मात तांणी तें आजूनय पाळूंक ना. रस्तो खणपा वेळार दिल्लीं आस्वासना कंत्राटदार विसरलो. ताका लागून नागरिकांनी तिडक उक्तायल्या.
मजगतीं, हे घडणुकेचो निशेध म्हणून फाटल्या पंदरा दिसां पयलीं तुयें सरपंच सुलक्षा नायक, पंचायत मंडळांनी नागरिकांच्या सहकार्यान हो रस्तो मुखार खणपाचें काम आडायल्लें. उपरांत कंत्राटदारान कांय प्रमाणांत जो रस्तो खणिल्लो थंय फातर घालून फोंडकुलां पुरोवन ताचेर डांबरीकरण करपाची प्रक्रिया सुरू केल्ली. मात तेंय काम सध्या बंद आसा. तुयें हॉस्पिटलाच्या मुखार जी उद्देगीक वसणुकेंत वचपाक गेट आसा, ते गेटी कडल्यान तुयें वीज केंद्रा मेरेन परत रस्तो खणपाचें काम सुरू केलां. ते खातीर नागरीक तिडक उक्तायतना दिसतात. खणिल्ले रस्ते पयलींच धोको निर्माण करतात. तांचें आजूनय डांबरीकरण करूंक ना. हेच रस्ते दुसरे वटेनूय लायटीच्यो सरयो घालतना खणिल्ले. तेय रस्ते तशेच आसात. पुरोवंक ना. आतां दुसर्या रस्त्याचें खणपाचें काम नेटान चालू आसा. घडये कंत्राटदाराक कामाचे पयशे मेळपाक कळाव जाल्ल्यान तो कामां फटाफट करीना आसतलो, अशें कांय नागरिकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
