भांगरभूंय | प्रतिनिधी
हिंदू देव-देवता आड वादग्रस्त विधानां करून वाद निर्माण करपी समाजवादी पक्षाच्या फुडार्याचेर न्यायालयान चाबूक मारला. समाजवादी पार्टीचे आदले सरचिटणीस आनी आदले मंत्री स्वामी प्रसाद मौर्या हांचेर लोकांची भावना दुखोवपाचो आनी देवदेवता आड विधानां करून समाजांत दुस्वास पातळावपाचो आरोप करून केस नोंद जाल्या.
एमपीएमएलए न्यायालयाचे अतिरिक्त मुखेल न्यायालयीन दंडाधिकारी अंबरीश श्रीवास्तव हांणी वझीरगंज पुलीस स्टेशनाचे प्रभारी हांकां मौर्या हांचेर कारवाय करपाचे आदेश दिल्यात.
स्वामी प्रसाद मौर्य हांचे आड गुन्यांव दाखल करपाची मागणी करपी याचिका न्यायालयांत दाखल केल्ली. दंडाधिकार्यान शेनवारा (१६ मार्च) हो निकाल दिलो. फाटल्या वर्सा दिवाळे दिसा स्वामी प्रसाद मौर्य हांणी मायक्रोब्लॉगिंग प्लॅटफॉर्म एक्सचेर पोस्ट करून वाद निर्माण केलो.
१२ नोव्हेंबर २०२३ लक्ष्मीपुजेच्या दिसा देशभरांतल्या लोकांनी घरां घरांत लक्ष्मीपुजा केल्ली. मजगतीं, मौर्यान आपल्या बायलेची पुजा करून एक्सचेर कांय फोटो शेअर केले. तशेंच हे फोटो शेअर करतना तांणी लक्ष्मी देवी विशीं वादग्रस्त विधान केलें.
स्वामी प्रसाद मौर्या हांणी एक्सचेर बरयल्लें, ‘दिपोत्सवाच्या निमतान हांव म्हजे बायलेची पुजा करतां आनी मान दितां. तशेंच संवसारांतल्या खंयच्याय धर्मांत, जातींत, वंशांत, रंगांत वा देशांत जल्मल्ल्या भुरग्याक दोन हात, दोन पांय, दोन कान, दोन दोळे आनी दोन बुराक आशिल्लें नाक, एक तकली, एक पोट आनी एक फाट आसता. मात चार हात, आठ हात, धा हात, वीस हात, हजार हात आशिल्लें भुरगें अजून ह्या संवसारांत जल्मूंक ना. मागीर चार हात आशिल्ली लक्ष्मी कशी जल्माक येवपाक शकता? लक्ष्मीची पुजा करपाची आसल्यार बायलेची पुजा करची, तिचो मान करचो. कारण ती तुमच्या कुटुंबाक पोसता, घरांतल्या सुखाची आनी समृध्दीची जतनाय घेता. तशेंच आपली जापसालदारकीय ती पुराय करता.’
स्वामी प्रसाद मौर्यान आदीं हिंदू देवां विशीं वादग्रस्त विधानां केल्यांत. दिवाळे आदीं एका कार्यावळींत तांणी सांगिल्लें, अयोध्येंत श्रीरामाची मूर्त स्थापन करप म्हणल्यार एके तरेची फटवणूक. बौध्द उत्सवांत ताणें रामायणाच्यो कांय ओळी वाचून वादग्रस्त विधान केलें. मौर्या हांणी म्हणलें, सरकारान अयोध्यांत नाटक तयार केलां. देशांतल्या तरणाट्यांक आनी नागरिकांक फटोवपाच्या हेतान सरकारान अयोध्यांत राममुर्ती स्थापन करपाचें नाट्य निर्माण केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
