केप्यां काजू बियो व्हरपी ट्रकाक अपघात: दोग जाणांक मरण, ११ जाणां जखमी
भांगरभूंय | प्रतिनिधी
मडगांव, प्रतिनिधी : पाडी-केपें हांगा शेनवारा रातीं उसरां काजू बियो व्हरपी ट्रकान पुलाच्या कठड्याक धपको दिल्या उपरांत तो दरींत कोसळून दोगांक मरण आयलें . ह्या ट्रकांत १३ जाण आशिल्ले. जखमींक हॉस्पिटलांत दाखल केल्यात. हातूंत ५ दादले, ५ भुरग्यां सयत ३ बायलांचो आसपाव आसा.
मेळिल्ले म्हायती प्रमाण, पाडी केपें हांगाच्या महामार्गाचेर रातच्या सुमार १०.३० वरांचेर हो अपघात जालो. काजू बियो व्हरपी ट्रक पाडी हांगा पावलो तेन्ना ताचो धपको रस्त्या कुशीक आशिल्ल्या पुलाच्या कठड्याला बसलो. धपको बसना फुडें ट्रक रस्त्या कुशीचे न्हंयेंत वचून पडलो. न्हंयत चड उदक नाशिल्लें. मात काजू बियांच्यो पोतयो ट्रकांत आशिल्ल्यांचेर पडल्यो.
मजगतीं, काणकोणां एके कार्यावळी खातीर गेल्ले मुख्यमंत्री डॉ. प्रमोद सावंत हांचे सयत मंत्री सुभाष फळदेसाय, नरेंद्र सावयकार आनी तांचे वांगडा आशिल्ले कर्मचारी अपघाताचेर सुवातेर पावले आनी तांकां तांणी मजत करपाक सुरवात केली. मुख्यमंत्र्यांचे गाडयेंतल्यान अपघातांत जखमी जाल्ल्या भुरग्यांक हॉस्पिटलांत व्हेले.
ह्या अपघातांत अप्पू नांवाची एक बायल गंभीर जखमी जाल्ली. उपचारा मजगतीं तिका मरण आयलें. तशेंच एका दादल्याकूय मरण आयलां.
ह्या अपघातांत जखमी जाल्ल्या कांय जाणांक भलायकी केंद्रांत जाल्यार कांय जाणांक दक्षीण गोंय जिल्हो हॉस्पिटलांत दाखल केल्यांत. तशेंच चार भुरग्यांक चड उपचारा खातीर बांबोळेच्या गोंय वैजकी महाविद्यालयाच्या हॉस्पिटलांत दाखल केल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
